RUS
SMARTNEWS.KZ басылымының хабарлауынша, Алтай қаласында әлеуметтік желідегі жазба үшін қозғалған іс сотта қаралды. Instagram-да жарияланған постқа байланысты бір отбасының арызынан кейін басталған даулы жағдай медиациямен аяқталды.
Сот материалдарына сәйкес, азаматша А. сотқа жүгініп, азаматша Н.-ны қылмыстық жауапкершілікке тартуды сұраған. Оның айтуынша, Instagram желісінде жарияланған жазбада оның отбасына қатысты қорлайтын сөздер айтылып, абыройы мен қадір-қасиетіне нұқсан келген.
Алайда кейін жәбірленуші тарап өз шағымынан бас тартып, тараптар татуласқаны туралы өтініш берген. Іс бойынша медиациялық келісім жасалып, онда азаматша Н. жәбірленушіге 100 мың теңге көлемінде өтемақы төлеуге және Instagram парақшасында отбасыдан кешірім сұрайтын жазба жариялауға міндеттелген. Сонымен қатар бұл жазбаны бір ай бойы өшірмеу шарты қойылған.
Сот тараптардың келісімін негізге ала отырып, қылмыстық істі тоқтатты. Нәтижесінде азаматша Н. қылмыстық жауапкершіліктен босатылды.