RUS
Шығыс Қазақстан облысы аумағында әскери қызметкердің қаза табуына қатысты қылмыстық іс сотқа жіберілді. Бұл туралы Қазақстан Республикасының Бас әскери прокуратурасы хабарлады.
Тергеу мәліметінше, Өскемен гарнизонындағы әскери бөлімдердің бірінде 23 қаңтар күні қаза тапқан сарбаз ісі бойынша батальон және взвод командирлеріне қатысты тергеу аяқталған.
Прокуратура дерегіне сәйкес, лауазымды тұлғалар әскери жарғыға қайшы әрекеттерге жол беріп, марқұм сарбазға және оның алты әріптесіне жүйелі түрде психологиялық қысым көрсеткен. Сонымен қатар взвод командирі қару сақтау тәртібін бақылаудан шет қалған.
Тергеу барысында жеткілікті дәлелдер жиналып, барлық қатысы бар тұлғалар анықталған. Қылмыстық іс билікті асыра пайдалану және қызметке салғырт қарау баптары бойынша сотқа жолданды.
Оқиғадан кейін бірқатар кадрлық шешімдер қабылданған: әскери бөлім командирі мен оның екі орынбасары қызметтен босатылып, тоғыз лауазымды тұлға тәртіптік жауапкершілікке тартылған.
Ведомство мұндай істерді тергеу әдістемесі жетілдірілгенін, соның ішінде оқиға орнын қарау, дәлелдерді тіркеу және сараптама жүргізу тетіктері күшейтілгенін атап өтті. Сондай-ақ әскери тергеу органдары мен сараптама орталықтары арасында жедел әрекет ету үшін арнайы меморандум жасалған.
Еске салсақ, 23 қаңтар күні аталған әскери бөлімде мерзімді қызметтегі сарбаз қарауыл кезінде оқ жарақатынан көз жұмған. Осы дерек бойынша қылмыстық іс қозғалған болатын.