RUS
Telegram негізін қалаушы Павел Дуров интернеттегі шектеулер тақырыбына арналған әнін таныстырды. Жаңа туындысын ол өзінің Telegram-арнасында жариялаған.
Дуровтың айтуынша, музыкаға қызығушылығы 90-жылдары басталған. Ол кезде қарапайым бағдарламалар арқылы тректер жасағанын еске алып, қазір бұл әуестігін заманауи құралдармен қайта жандандырғанын мәлімдеді.
Кәсіпкер енді өз шығармаларын тұрақты түрде жариялап тұратынын айтып, “Дурикович” атты шығармашылық бүркеншік есімді таңдаған.
Жарияланған композиция “Свой живой интернет” деп аталады. Ән мәтінінде интернеттегі шектеулерге қарсылық, еркін цифрлық кеңістік идеясы көрініс тапқан. Автор бұғаттауларға қарамастан, “тірі интернетке” жол табу идеясын алға тартады.
Бұл қадам Дуровтың цифрлық еркіндік тақырыбын тек технологиялық емес, мәдени форматта да көтеруге көшкенін аңғартады.