RUS
SMARTNEWS.KZ басылымының хабарлауынша, Астанада Бас прокуратура қызметкері мас күйінде көлік жүргізгені үшін жауапқа тартылды. Сот оны кінәлі деп танып, жеті жылға жүргізуші куәлігінен айырды.
Іс материалдарына сәйкес, оқиға 29 наурызға қараған түні болған. Бас прокуратура қызметкері Әсет Жүкенов жұбайының атына тіркелген Chery Tiggo автокөлігін басқарған.
Сотта Жүкенов айыбын мойындамады. Ол ішімдік ішкенін растағанымен, көлікті өзі жүргізбегенін алға тартты. Оның сөзінше, серуеннен кейін тоңып, тек рөлде отырған, ал көлікті басқа адам айдаған.
Алайда полиция ұсынған бейнежазбада көліктің қозғалыста болғаны және рөлде дәл Жүкенов отырғаны анық көрінеді. Бұл ұстанымды сотта Астана прокуратурасының өкілі де қолдады.
Нәтижесінде сот оны Әкімшілік құқық бұзушылық туралы кодекстің 608-бабы бойынша кінәлі деп танып, жеті жылға көлік жүргізу құқығынан айырды. Әкімшілік қамау жазасы қолданылмады. Заңға сәйкес, құқық қорғау органдарының қызметкерлері мен әскери қызметшілер әкімшілік қамауға алынбайды.
Сот шешімі апелляциялық сатыдан өтіп, заңды күшіне енді.
Сонымен қатар Жүкеновке қатысты тәртіптік жауапкершілік мәселесі әзірге ашық күйінде қалып отыр. Бас прокуратура мәліметінше, тиісті материалдар қаралған, алайда қызметкердің уақытша еңбекке жарамсыздықта болуына байланысты қандай да бір шара қолдану әзірге мүмкін емес.