RUS
«1 қыркүйектен кейін елге кіргізілген көліктер шетте қалып қойды. Қазір Қазақстанда Грузия, Армения, Ресей және Қырғызстаннан кірген 80 мыңға жуық көлік бар. Оған тосқауыл қоймасақ, ол әлі де кіре береді. Біздің бірінші ұсынысымыз – осы шекаралас елдерден кіріп жатқан көліктерге қатаң бақылау қою. Қосалқы бөлшектермен кіргізілген, яғни «конструктор» көліктерді кеденнен өткізу кезінде тіркеу керек. Қазір мұның барлығы толық автокөлік болып кіріп жатыр. Енді ол кірген сайын, көбейе береді. Бұл автобелсенділер наразылығының екінші толқын әкеліп соғуы мүмкін», - деді Наурыз Сайлаубай.
Сұхбат барысында ол мәселені шешудің тағы бір жолын ұсынды. Атап айтқанда, депутат 1 қыркүйектен кейін елге әкелінген 80 мың көлікті заңдастыру қажет екенін мәлім етті.
«Екінші ұсыныс – осы кіріп қойған 80 мың автокөлікті заңдастыруға тағы да уақыт беру. Біз қазір депутаттық сауалды жолдап жатырмыз. Ол белгілі бір уақыттан кейін келеді. Сосын оны автоблогерлермен талқылаймыз. Кейін халыққа қайта жариялаймыз. Тағы бір мәселе – бұл көліктерді қарапайым халық алып жатыр. Арзан, сапасы жақсы. Енді бұл жерде 200-250 мың теңге таба алмай отырған адамдар да бар. Сондықтан, көліктерді тіркеу үшін көпбалалы отбасыларға, әлеуметтік осал топтарға және 35 жасқа дейінге жастарға 50% жеңілдік берсе екен дейміз. Мысалы, аудан, ауылдарға барсаңыз, тұрғындар 30 жыл болған көліктермен жүр», - деп тоқталды депутат.
Наурыз Сайлаубайдың айтуынша, 80 мың көлік – ресми дерек. Ол бейресми ақпарат бойынша елге кіргізіліп жатқан автокөліктер одан да көп болуы мүмкін екенін атап өтті.