RUS
SMARTNEWS.KZ басылымының хабарлауынша, Алматыда сауда орталығында түсірілген қойылымдық видео үшін ер адам мен төрт әйел әкімшілік жауапкершілікке тартылды. Оқиға қоғамдық тәртіпті бұзғаны үшін назарға іліккен.
Желіде тараған видеода ер адам беттері жабық төрт әйелмен бірге сауда орталығында жүріп, қымыз жарнамалағаны көрсетілген. Бұл жазба Threads әлеуметтік желісінде жарияланып, қоғамда түрлі пікір тудырды.
Алматы қалалық полиция департаментінің мәліметінше, мониторинг барысында қоғамдық орында бет-әлпеті толық жабылған адамдардың қатысуымен түсірілген видео анықталған.
Тексеру нәтижесінде бұл роликтің қойылымдық сипатта екені, яғни коммерциялық түсірілім аясында жасалғаны белгілі болды. Дегенмен, кейбір қатысушылардың әрекетінде қоғамдық орындарда тұлғаны тануға кедергі келтіретін киім киюге қатысты заң талаптарын бұзу белгілері анықталған.
Полиция барлық қатысушыларға әкімшілік шара қолданып, ескерту бергенін хабарлады. Сонымен қатар олармен түсіндіру және алдын алу жұмыстары жүргізілген.
Құзырлы орган қоғамдық орындарда болу мақсатына қарамастан, заң талаптарын сақтау баршаға бірдей міндет екенін еске салды.