RUS
Алматыда «Таза Қазақстан» жалпыұлттық экологиялық акциясы аясында кең ауқымды сенбілік ұйымдастырылды. Іс-шара өткен негізгі орындардың бірі – көркем табиғатымен танымал Аюсай шатқалы болды.
Сенбілікке мемлекеттік мекемелердің өкілдері, экологиялық және қоғамдық ұйымдар, бизнес қауымдастық, жастар мен еріктілер қатысты. Жалпы алғанда, мыңға жуық адам жұмылдырылды.
Аюсай визит орталығы – «Іле-Алатау» ұлттық саябағының аумағындағы заманауи туристік және экологиялық кешен. Мұнда келушілер легі жыл бойы тоқтамайды, сондықтан шатқалдың тазалығын сақтау ерекше маңызды.
«Біз бірлесе отырып, қоршаған ортаны қоқыстан тазартып, адамдар үшін қолайлы кеңістік қалыптастырудамыз, бұл біздің күнделікті міндетіміз. Бүгін сенбілікке ұжымымыздан 100 адам қатысып, алты техника жұмылдырылды. Біз тек өзіміз қатысып қана қоймай, қала тұрғындарын табиғатты аялауға шақырамыз. Соңғы уақытта адамдардың экологиялық жауапкершілігі артып, табиғатқа деген жанашырлық көзқарас қалыптасып келе жатқанын байқаймыз. Бұл осындай игі бастамалардың нәтижесі», — деді «Алматы Тазалық» МКК басшысының орынбасары Ербол Байжанов
Қатысушылар ұзындығы 2,5 шақырым аумақты — Аюсай визит-орталығынан шлагбаумға дейінгі аралықты, өзен жағалауын, жол жиегін және тау беткейлерін тазартты. Тұрмыстық қалдықтар мен сынған бұтақтар жиналып, нәтижесінде 450 текше метр қоқыс шығарылды.
«Біз де сенбілікке қатысып, жас ұрпаққа үлгі көрсетуді жөн көрдік. Қоршаған ортаның тазалығына қамқорлық жасау — әрбір азаматтың парызы. Бұл іс-шара аумақты тазарту ғана емес, қоғамды біріктіруге және экологиялық жауапкершілікті арттыруға бағытталған маңызды қадам. Табиғатқа деген сүйіспеншілік әрқайсымыздан басталады», — деді Алматы тұрғыны, зейнеткер, Бостандық ауданы Ардагерлер кеңесінің мүшесі Гүлсара Қабиланова.
Ұйымдастырушылардың айтуынша, Аюсай шатқалы секілді табиғи аумақтарды тазарту — бір реттік науқан емес, экологиялық мәдениетті қалыптастыруға бағытталған жүйелі жұмыстың құрамдас бөлігі.