RUS
SMARTNEWS.KZ басылымының хабарлауынша, Шымкентте ірі көлемдегі заңсыз интернет-казино ұйымдастырған қылмыстық топтың жолы кесілді. Қаржылық мониторинг агенттігінің мәліметінше, көлеңкелі бизнестің жалпы айналымы небәрі бірнеше айда 557 миллион теңгеден асып кеткен.
Тергеу дерегіне сәйкес, қала тұрғыны «Vendetta» және «AMG600L» атауларымен жұмыс істеген ойын клубтарының желісін құрған. Олар покерге арналған мобильді қосымша арқылы қызмет көрсетіп, «Nomad» деп аталатын бірыңғай жүйеге біріктірілген. Бұл платформаға Қазақстанмен қатар Өзбекстан мен Қырғызстан ойыншылары да қол жеткізген.
Заңсыз жүйе нақты ойластырылған схема бойынша жұмыс істеген. Ойыншыларды тәулік бойы қолжетімділік, мессенджер арқылы таралатын жарнама және түрлі бонустар арқылы тартқан. Қатысушылар «фишкалар» үшін ақшаны банк карталарына аударып отырған, ал ұтыстар жалған тұлғалардың есепшоттары арқылы қолма-қол ақшаға айналдырылған.
Ұйымдастырушылар әр ойын үстелінен 3–5 пайыз көлемінде комиссия алып отырған. Ақшасы таусылған ойыншыларға виртуалды қарыз беріліп, олар жүйеде ұсталып отырған.
Қаржы ағындарын жасыру үшін дропперлердің, оның ішінде шетел азаматтарының есепшоттары пайдаланылған. Әр карта үшін 100–200 мың теңге аралығында ақы төленген. Агенттік мәліметінше, осы шоттар арқылы жүздеген миллион теңге өткізілген.
Тінту барысында күдіктінің тұрғылықты жерінен заңсыз ойын бизнесіне қатысты дәлелдермен қатар есірткі заттары да табылған.
Қазіргі уақытта екі күдіктіге қатысты үйқамақ түріндегі бұлтартпау шарасы таңдалған. Қылмыстық іс сотқа жолданды. Тергеу барысында кейбір ойыншылардың ірі шығынға ұшырағаны анықталды — жекелеген азаматтар небәрі бірнеше ай ішінде 30 миллион теңгеге дейін ұтылып қалған.