Астанада төрт елдің 300-ге жуық жас педагогі STEM мен AI-ды талқылады
Қазақстан, Қытай, Қырғызстан және Өзбекстан ұстаздары Астанада тәжірибе алмасты.
Іс-шараны «Назарбаев Зияткерлік мектептері» дербес білім беру ұйымының Педагогикалық шеберлік орталығы ұйымдастырды.
Бұған дейін «Жас ұстаз: табысқа апарар жол» республикалық форумы ретінде өткізіліп келген жоба биыл халықаралық деңгейге шықты. «STEM. AI. Innovation» атауымен өткен жаңа форматта жас педагогтер заманауи білім беру тәжірибелерімен бөлісіп, технологияларды сабақта тиімді қолдану жолдарын қарастырды.
Коннекке Оқу-ағарту министрі Жұлдыз Сүлейменова қатысып, жас мамандар үшін үздіксіз ізденіс пен жаңашылдықтың маңызын атап өтті.
Ал «Назарбаев Зияткерлік мектептері» ДББҰ Басқарма төрағасы Әнуар Жанғозин білім берудегі технологиялық өзгерістер ұстаздың рөлін де жаңа деңгейге шығарып отырғанын айтты.
«Жасанды интеллектіні меңгерген ұстаз мектептегі өзгерістің негізгі қозғаушы күшіне айналады. Технология қаншалықты жетілсе де, ол баланың бойында білімге деген құштарлықты, сыни ойлауды немесе өзіне деген сенімді өздігінен қалыптастыра алмайды. Сондықтан технологиядан қауіптенбей, оның мүмкіндігін ұстаздың әлеуетін күшейтуге пайдалану қажет», – деді ол.
Шара барысында қазақстандық және шетелдік сарапшылар жасанды интеллект құралдарын, STEM тәсілдерін және жаңа білім беру модельдерін қолдану тәжірибесімен бөлісті.
TED форматындағы сессияларда білім берудің инновациялық экожүйесін қалыптастыру, AI мүмкіндіктері, венчурлік ойлау мәдениеті және Қазақстандағы білім беру жүйесін цифрландыру тақырыптары қозғалды.
Спикерлер арасында AI және инновациялар саласының сарапшысы Давид Туғанов, венчурлік инвестор Бахт Ниязов, Орталық Азия бойынша «Жылдың IT-педагогі» атанған Рүстем Ермеков және Қытайдағы Shaanxi Normal University профессоры, доктор Hongliang Ma болды.
Практикалық бөлімде NIS педагогтері шеберлік сағаттарын өткізіп, қолданбалы тапсырмалар мен командалық квесттер ұйымдастырды. Қатысушылар инновациялық жобаларын таныстырып, жаңа технологияларды сабақта қолданудың нақты тәсілдерін сынап көрді.
«Жас ұстаз» жобасы 2022 жылы кәсіби жолын енді бастаған педагогтерді қолдау мақсатында іске қосылған. Осы уақытқа дейін республикалық форумдарға 1000-нан астам жас мұғалім қатысып, өңірлік іс-шаралар шамамен 20 мың педагогті қамтыған.
