Жеті партия алғаш рет командалық теледебатқа шығады

SMARTNEWS.KZ басылымының хабарлауынша, 12 тамызда Jibek Joly телеарнасында тарихи Құрылтай сайлауына қатысатын жеті саяси партия өкілдерінің алғашқы командалық теледебаты өтеді. Тікелей эфир сағат 20:00-де басталады.

Дебаттың тақырыбы – «Заң мен тәртіп – әділетті Қазақстанның негізі» турасында болмақ. Ал пікірталасқа «Әділет», ЖСДП, «Байтақ», Қазақстан Халық партиясы, «Ауыл», «Ақ жол» және Respublica партияларының өкілдері қатысады.

Партиялардан дебатқа екі-екіден өкіл шығады:

• «Әділет» – Айжан Аймағанова және Мәди Мырзағараев;

• ЖСДП – Лариса Ли және Нұрайнаш Камалова;

• «Байтақ» – Амалбек Өміртай және Алмат Тұртаев;

• Қазақстан Халық партиясы – Жандос Бидайбеков және Ирина Смирнова;

• «Ауыл» – Жазира Сұлтанқұлова және Ерболат Саурыков;

• «Ақ жол» – Бек-Мұхамед Жаукебаев және Ермек Әбілдин;

• Respublica – Олжас Құспеков және Динара Шүкіжанова.

Дебат барысында қатысушылар сайлаушыларды өз партиясының бағдарламасы қолдауға лайық екеніне сендіруге тырысады. Сонымен қатар сайлауалды бағдарламалар талқыланып, олардың әлсіз тұстарына қатысты пікірлер айтылады.

Көрермендер де пікірталасқа тікелей араласа алады. Олар эфир кезінде экрандағы QR-код немесе WhatsApp арқылы қатысушыларға сұрақ жолдау мүмкіндігіне ие болады.

Сондай-ақ әр партия өкілеттік мерзімі ішінде орындауға міндеттелетін бір нақты уәдесін ұсынуы тиіс.

Дебаттан кейін Jibek Joly телеарнасында «Ашық студия» саяси ток-шоуы эфирге шығады. Онда сарапшылар пікірталастың негізгі сәттерін, партия өкілдерінің ұстанымдарын және дебаттың сайлау науқанына ықпалын талқылайды.

Алғашқы командалық теледебатты 12 тамыз күні сағат 20:00-де Jibek Joly телеарнасының тікелей эфирінен және оның ресми YouTube арнасынан көруге болады.