RUS
«Қазақстан футболындағы негізгі мәселенің бірі – ойын алаңдарының инфрақұрылымы. Қазақстан футбол федерациясы басшылығымен осы мәселені талқыладыңыздар ма? Өз тарапыңыздан қандай ұсыным-кеңестер айттыңыз?» - деп сұрады БАҚ өкілі.
Джанни Инфантиноның айтуынша, инфрақұрылым мәселесі бүкіл әлемде өзекті.
«Неғұрлым көбірек алаң салу керектігін айттым. Шынымен де солай. Қазақстанда ғана емес, әлемнің басқа елдерінде де инфрақұрылым деген өте маңызды мәселе. Футбол – өте қарапайым спорт түрі. Доп пен алаң болса жетіп тұр. Алаң болмаса да футбол ойнауға болады. Бірақ алаңда ойнағанға не жетсін?! Футбол инфрақұрылымына инвестиция салудың маңызы өте зор. FIFA тұрғысынан айтсақ, бізде «FIFA бүкіл әлем үшін» деген бағдарламамыз бар. Ол бағдарлама әлемдегі бүкіл футбол қауымдастықтарына көмектесуді көздейді. Бюджетіміз – 8 млн доллар. Түрлі жобаларға, инфрақұрылымға арналған. Біз Қазақстан футбол федерациясымен жаңа ойын алаңдарының мәселесін, Талғардағы футбол орталығын талқыладық. Федерацияға футбол алаңдарының біріне әлемдегі ең ұлы футболшылардың бірі — Пеленің атын бергені үшін алғыс айтып, құттықтағым келеді», - деді FIFA президенті.
Сондай-ақ, ол футбол инфрақұрылымы мәселесін Президент Қасым-Жомарт Тоқаевпен де талқылағанын атап өтті.
«Қазақстан FIFA турнирлерін, жасөспірімдер арасында әлем чемипонатын, 17, 20-жасқа дейінгі жастар арасында әлем біріншіліктерін өткізуге ниеттенсе, әуелі инфрақұрылым өзгеруі керек екені анық мәселе.
Стадиондар көбірек болғаны керек. Астанадағы стадион өте әдемі. Бірақ ол төбесі жабылатын жалғыз стадион. Бізге көбірек стадион керек және оның бәрі орасан үлкен болуы міндетті емес. Бізге шағындау болса да, жастар, өзге адамдар көбірек ойнай алатын стадиондардың көп болғаны маңызды.
Қазақстан футбол федерациясының, ел Президентінің футбол инфрақұрылымына инвестиция салуға деген ынтасы күшті. Өйткені футбол инфрақұрылымына салған ақша – Қазақстан халқына, жастарына салынған инвестиция. FIFA-ға да осы іспен айналысу керек. Біз де өз үлесімізді қосып жатырмыз, Қазақстан да өз үлесіп қосып жатыр. Келешекте балалардың ойнауына арналған футбол алаңдары мен алаңқайлары көп болатынына сенімдімін. Қазақстан үшін күн суық кезеңде де футбол ойнауға мүмкіндік беретін төбесі жабылатын ареналардың болғаны өте маңызды. Осы бағытта жұмыс істеп жатырмыз», - деді Джанни Инфонтино.