RUS
SMARTNEWS.KZ басылымының хабарлауынша, Қазақстанда қалдықтарды басқару жүйесін түбегейлі реформалау басталды. Бұл өзгерістер барлық қалдық түрін қамтитын бірыңғай ережелерді енгізіп, мүлде жаңа экономикалық сектор қалыптастыруды көздейді. Бұл туралы BIZDIÑ ORTA подкастында «Жасыл Даму» АҚ басқарушы директоры Данияр Байғараев мәлімдеді.
Сарапшының айтуынша, қазіргі жүйе толыққанды жұмыс істемейді. Елде нақты салалық реттеу тек коммуналдық қалдықтармен шектелген, ал қалған бағыттар жүйесіз қалып отыр.
– Бүгінде нақты ережелер тек коммуналдық қалдықтарға қатысты. Ал жалпы шамамен 20 түрлі қалдық бар. Соның ішінде күнделікті кездесетін 9 негізгі түрі бар, оған құрылыс пен медициналық қалдықтар да кіреді. Бұдан бөлек, 60-қа жуық қосымша түрлері бар. Бірақ олардың барлығы бір ғана қағидамен реттеліп отыр, – деді Данияр Байғараев.
Жаңа реформа осы олқылықты жоюға бағытталған. Енді қалдықтардың әр түріне қатысты нақты әрі түсінікті талаптар енгізіледі.
– Біз кешенді әрі бірыңғай жүйеге көшеміз. Кейбір қалдық түрлері жеке реттеледі, ал кейбірі ортақ ережелермен біріктіріледі. Ең бастысы – барлық қатысушылар үшін ортақ талаптар қалыптасады, – деп түсіндірді ол.
Реформаның тағы бір маңызды бағыты – экономикалық әлеует. Яғни, қалдықтарды басқару тек экологиялық міндет емес, табыс әкелетін салаға айналмақ.
– Негізгі мақсат – жаңа нарық құру. Ол жұмыс орындарын ашады және табыс әкелетін толыққанды индустрия қалыптастырады. Қазақстанда мұндай нарық іс жүзінде алғаш рет пайда болғалы отыр, – деді «Жасыл Даму» өкілі.
Сарапшының сөзінше, бұл өзгерістер экологиялық реттеуді күшейтіп қана қоймай, елдегі «жасыл» экономиканың дамуына серпін береді.