RUS
«Қазіргі таңда Қазақстанда 27 моноқала бар және оларда 1,4 млн адам тұрады. Көбісінде ұқсас, шешілмеген проблемалар аз емес, әсіресе жаппай көшіп кету, халық санының азаюы, жұмыссыздық, инженерлік-көлік инфрақұрылымның тозуы және әлеуметтік инфрақұрылымның жетіспеушілігі мен төмен материалдық-техникалық қамтылу байқалады», - деді депутат Мәжілістің жалпы отырысында.
Оның айтуынша, Екібастұз, Кентау және Арқалық қалаларында су желілері, кәріз, жылу және электрмен жабдықтау жүйелердің тозу мөлшері 85% асты. Арқалықта жолдардың 80% астамы қанағаттанарылықсыз жағдайда, ал бала өлімі көрсеткіші 2022 жылы алдындағы жылмен салыстырғанда 40% артқан. Оның негізгі себептері – медицина кадрларының тапшылығы мен денсаулық сақтау мекемелерінің материалдық-техникалық базасы деңгейінің төмендігі. Нәтижесінде халықтың 50% астамы басқа өңірлерге көшіп кетуге мәжбүр болды.
Осыған орай, Ұлттық экономика министрлігі мен әкімдіктер Алтай, Балқаш, Жаңатас, Қаратау, Лисаковск, Риддер, Серебрянск, Степногорск және Арқалық сияқты 10 қаланы әлеуметтік-экономикалық дамытудың 2023-2027 жылдарға арналған кешенді жоспарын әзірлеген.
«Осы күнге дейін бұл жоспарларды Үкімет бекіткен жоқ. Яғни, 2023 жылдан бастап іске асырылуы тиіс кешенді жоспарлар әлі орындалмай отыр. Бұл мәселе «AMANAT» партиясының сайлауалды үгіт-насихат жұмысында моноқалалардың жұртшылығымен болған кездесулерде аз көтерілген жоқ. Жоспарларды уақытылы қабылдау шағын және орта бизнестің жаңа субъектілерін ашу мен өнеркәсіптік өндіріс көлемін ұлғайтуға және жеке инвестициялар тартуға, білім беру, денсаулық сақтау, мәдениет және спорт объектілерінде қолайлы жағдайлар жасауға, халықты орталықтандырылған сумен қамтуды жақсартуға мүмкіндіктер береді. Осы аталғандарға байланысты Кешенді жоспар жобаларын Үкіметтің бекітуін жеделдетіп, іске асыруға кірісу қажет деп санаймыз», - деді Берік Бейсенғалиев.