RUS
SMARTNEWS.KZ басылымының хабарлауынша, Қазақстанда қалдықтарды қайта өңдеу табысты әрі толыққанды салаға айналуы тиіс. Қалдықтарды басқару жүйесінде сызықтық модельден айналмалы, яғни циркулярлық экономикаға көшу бизнес үшін жаңа мүмкіндіктер ашып, қайта өңдеу көлемін арттыруға ықпал етеді. Бұл туралы BIZDIÑ ORTA подкастында «Жасыл Даму» АҚ басқарушы директоры Данияр Байғараев мәлімдеді.
Оның айтуынша, дәстүрлі жүйе қалдықтарды тек проблема ретінде қарастырса, заманауи тәсіл оны экономикалық ресурс ретінде бағалайды.
«Сызықтық қалдықтарды басқару жүйесінде қалдық әрдайым проблема ретінде қабылданады: ол пайда болады, бірақ әрі қарай не істеу керектігі шешілмей қалады. Ал циркулярлық экономика мүлде басқа көзқарас ұсынады, мұнда қалдықтар шикізат әрі қосымша табыс көзі ретінде қарастырылады», – деді Данияр Байғараев.
Ол Экология министрлігі әзірлеген қалдықтардың барлық түрін басқару жөніндегі тұжырымдаманың қабылдануын маңызды тарихи қадам деп атады.
«Қазақстан Тәуелсіздік алған 35 жыл ішінде алғаш рет қалдықтардың барлық түрін басқару жөніндегі тұжырымдама қабылданды. Оны әзірлеуге шамамен 120 отандық және халықаралық сарапшы қатысты. Бұл – саланың барлық процесін жүйелеген алғашқы кешенді құжат», – деді ол.
Аталған құжат аясында ашық ережелер қалыптастыру және бизнесті ынталандыруға бағытталған заңнамалық тетіктер енгізіліп жатыр.
«Біз басқару қағидалары мен ынталандыру шараларын әзірлеп жатырмыз. Қосымша реттеу құралдары енгізілген сайын сала хаостан жүйелі басқаруға көшеді», – деп түсіндірді «Жасыл Даму» АҚ өкілі.
Сондай-ақ ол кәсіпкерлерді қалдықтарды қайта өңдеу процесіне белсенді тарту басты бағыттардың бірі екенін атап өтті.
«Біз барлық қалдық түрін есепке алып, инфрақұрылымдағы олқылықтарды анықтап, нақты шешімдер ұсынуымыз керек. Қазір ірі жобалар портфелі қалыптасып жатыр. Ең маңыздысы – осы ресурстарды бизнеске тиімді ұсыну», – деді ол.
Сарапшының пікірінше, саланы дамытудың негізгі қозғаушы күші – экономикалық мүдде.
«Кәсіпкерлер үшін ең бастысы – экономикалық тиімділік. Сол себепті қалдықтарды шикізат ретінде ұсыну жүйесі шешуші рөл атқарады», – деді ол.
Қайта өңдеу көлемінің артуы экологиялық жағдайға тікелей әсер ететіні де айтылды.
«Қайта өңдеу көбейген сайын полигондарға түсетін қалдық азаяды. Бұл өз кезегінде экологияға нақты оң әсер береді», – деп түйіндеді Данияр Байғараев.
Сарапшылардың пікірінше, циркулярлық экономиканың дамуы Қазақстанға тек экологиялық жүктемені азайтып қана қоймай, жаңа бизнес бағыттарын қалыптастыруға да жол ашады.