RUS
SMARTNEWS.KZ басылымының хабарлауынша, АҚШ-та ел тәуелсіздігінің 250 жылдығына орай жаңа сериядағы паспорттар шығарылып, олардың мұқабасына қазіргі президент Трамптың портреті орналастырылады.
АҚШ Мемлекеттік департаментінің мәліметінше, ерекше дизайндағы бұл құжаттар Вашингтондағы паспорт агенттігі арқылы берілмек. Ал онлайн өтінім жасағандар немесе басқа бөлімшелерге жүгінген азаматтар бұрынғы стандартты үлгідегі паспорт алады.
Жарияланған макетке сәйкес, паспорттың ішкі алдыңғы бетіне Трамптың бейнесі мен алтын түсті қолтаңбасы түсіріледі. Артқы мұқабада америкалық суретші John Trumbullдың «Тәуелсіздік декларациясы» картинасының бір бөлігі бейнеленеді. Мұндай паспорттардың нақты қанша дана шығатыны әзірге айтылмады.
Қазіргі стандартты америкалық паспорттарда суретші Edward Percy Moranның туындысы қолданылады. Онда АҚШ әнұраны мәтінінің авторы Francis Scott Key бейнеленген.
Бұған дейін де Трампқа қатысты бірнеше символикалық өзгеріс жарияланған болатын. Атап айтқанда, АҚШ тәуелсіздігінің 250 жылдығына арналған 100 долларлық купюраларда президенттің қолтаңбасы пайда болатыны хабарланған. Осылайша 165 жылдан бері алғаш рет қазынашының қолтаңбасы банкноттан алынып тасталмақ.
Сонымен қатар АҚШ-тың көркем өнер комиссиясы Трамп бейнеленген 24 караттық алтын монетаны шығаруды мақұлдады. Монетада президент жұдырығын түйіп тұрған сәт бейнеленіп, «Liberty» («Бостандық») деген жазу қашалады.
Соңғы айларда АҚШ-та Трамптың есімі бірқатар мемлекеттік және мәдени нысандарға да беріле бастады. Олардың қатарында Вашингтондағы бейбітшілік институты мен Джон Кеннеди атындағы өнер орталығы бар.