RUS
SMARTNEWS.KZ басылымының хабарлауынша, Ақтөбеде бірнеше адамның өмірін қиған жол апатына қатысты іс қайта қаралатын болды. Бұған дейін алқабилер соты ақтап жіберген Қырғызстан азаматына қатысты үкімнің күші жойылды.
33 жастағы Рамазан Инфуров бір ай бұрын сот залынан босатылған еді. Алайда прокуратура мен жәбірленуші тарап апелляциялық шағым түсіріп, іс қайта қарауға жіберілді.
Қылмыстық іс материалдарына сәйкес, қайғылы жол апаты Самара — Шымкент тасжолында болған. Mitsubishi Montero Sport көлігі мен Volvo жүк көлігі соқтығысып, салдарынан бір отбасының үш баласы мен әкесі қаза тапқан.
Бастапқыда айып жеңіл көлікті басқарған балалардың анасына тағылған. Іс Әйтеке би аудандық сотында қаралып, жол ережесін бұзу фактісі дәлелденбегендіктен ақтау үкімі шыққан.
Арада үш жыл өткен соң тергеу қайта жанданып, айып жүк көлігінің жүргізушісі Рамазан Инфуровке тағылды. Іс Ақтөбе облысының мамандандырылған ауданаралық қылмыстық сотында алқабилердің қатысуымен қаралды. Нәтижесінде сот оны қылмыс құрамы жоқ деп танып, ақтап шыққан.
Сонымен қатар жәбірленуші тараптың 50 миллион теңге моральдық өтемақы мен 500 мың теңге сот шығынын өндіру туралы азаматтық талабы қараусыз қалған.
Алайда кейін прокуратура үкімді жоюды талап етіп, апелляциялық өтініш берген. Апелляциялық алқа бұл уәжбен келісіп, істі қайта қарауға жолдады.
Сот материалдарына сәйкес, алқабилер құрамын жасақтау кезінде бірқатар заңбұзушылық анықталған. Алқабилердің бірі екі баласы барын айтып, процеске қатыса алмайтынын жеткізсе, тағы бірі ант беруден бас тартқан.
Бұдан бөлек, қосалқы алқабидің бірі сот басталмай тұрып-ақ ақтау үкімін қолдайтынын алдын ала айтқан.
Осыған байланысты Ақтөбе облыстық сотының сот алқасы бұрынғы үкімнің күшін жойып, істі сол сотта, бірақ басқа құраммен қайта қарау туралы шешім қабылдады.