RUS
SMARTNEWS.KZ басылымының хабарлауынша, Халықаралық футбол қауымдастықтары федерациясы — FIFA ауған босқын әйелдер құрамасына халықаралық жарыстарға қатысуға ресми рұқсат берді. Бұл шешім тәліптер билікке келгеннен кейін елден кетуге мәжбүр болған футболшылар үшін бес жылдық үзілістен соң қабылданып отыр.
Associated Press мәліметінше, тарихи шешім FIFA кеңесінің Канададағы отырысында бекітілген.
FIFA президенті Джанни Инфантино бұл бастаманың басқа елдердегі осындай жағдайға тап болған командалар үшін де маңызды үлгі болатынын айтты.
— Біз Afghan Women United бастамасын қолдаймыз. Бұл қадам ресми ұлттық команда ретінде тіркеле алмай отырған өзге қауымдастықтарға да мүмкіндік береді, — деді Инфантино.
Ауғанстан әйелдер құрамасы соңғы ресми матчын 2018 жылы өткізген. Ал 2021 жылы тәліптер билікке қайта келген соң елдегі әйелдер спортына толық тыйым салынды. Қудалаудан қауіптенген көптеген футболшы Ауғанстаннан кетуге мәжбүр болды.
Бұған дейін FIFA ережелері бойынша команданы тек Ауғанстан футбол федерациясы мойындауы керек еді. Алайда тәліптер әйелдер футболын қолдаудан бас тартқандықтан, команда халықаралық жүйеден тыс қалып келген.
Соңғы бірнеше жылда ауған футболшылары мен құқық қорғаушылар FIFA-дан ресми мойындау мен қаржылық қолдау сұрап, халықаралық деңгейде күрес жүргізді.
Команданың бұрынғы капитаны әрі негізін қалаушы Халида Попал бұл шешімді тарихи әділеттілік деп бағалады.
— Бес жыл бойы бізге ауған әйелдері енді ешқашан халықаралық футбол ойнай алмайды деп айтылды. Бұл шешім тек біздің болашағымызды ғана емес, әйел спортшылардың құқығын қорғау жолындағы күресті де өзгертеді, — деді ол.
Жаңа босқындар құрамасы FIFA-ның Ауғанстандағы әйелдер мен қыздарды қолдауға арналған арнайы стратегиясының бір бөлігіне айналды. Бағдарлама әйелдердің спортқа қатысу мүмкіндігін сақтауға бағытталған.
Ауған босқын әйелдер құрамасы алғашқы жолдастық матчтарын маусым айында өткізеді.