RUS
SMARTNEWS.KZ басылымының хабарлауынша, файтер Әліби Идрис UFC ұйымымен жасасқан келісімшартының ерекшеліктерін жария етті. Оның айтуынша, келісім үш жыл ішінде жеті жекпе-жек өткізуді міндеттейді.
Sports.kz мәліметінше, қазақстандық спортшы әлемдегі ең беделді промоушенге The Ultimate Fighter реалити-шоуы арқылы жолдама алған. Финалда америкалық Джозеф Моралеске есе жібергеніне қарамастан, UFC оған ресми келісімшарт ұсынған.
Әліби Идристің сөзінше, TUF жобасының қатысушыларына арналған келісімнің форматы өзгеше. Жауынгерлер үш жыл ішінде жеті кездесу өткізуі тиіс. Егер бұл талап орындалмаса, келісімшарт қайта қаралуы немесе мүлде ұзартылмауы мүмкін.
Спортшы қазіргі таңда келісім аясында тағы бес жекпе-жек өткізуі керегін айтты. Оның болашақтағы тағдыры осы кездесулердегі нәтижеге тікелей байланысты болмақ.
Сондай-ақ Идрис UFC-дің TUF қатысушыларын танымал етуге қомақты қаржы құятынын атап өтті. Оның пікірінше, арнайы келісімшарт — ұйымның өзін сақтандыру тетігі. Егер спортшы жұлдызға айналса, UFC алдын ала бекітілген шартпен оның жеті жекпе-жегін өткізу мүмкіндігін сақтап қалады.