RUS
SMARTNEWS.KZ басылымының хабарлауынша, Алматы облысында картон зауыты аумағындағы қойма ангарында шыққан ірі өрт толық сөндірілді. Тілсіз жау 2800 шаршы метр аумақты шарпыған.
Төтенше жағдайлар министрлігінің мәліметінше, Қарасай ауданындағы Абай ауылында орналасқан картон зауыты аумағына алғашқы өрт сөндірушілер жеткен кезде ангар ашық жалынға оранып үлгерген. Өрт тез таралып, жағдай күрделене түскен.
Оқиға орнында жедел штаб құрылып, Алматы облыстық төтенше жағдайлар департаментінің күштері күшейтілген режимде жұмыс істеді. Мамандар үздіксіз су беру жүйесін ұйымдастырып, бірнеше бағыттан су атқылаған.
Ведомствоның мәліметінше, өрттің жылдам таралуына қоймада сығымдалған картон қораптардың көп мөлшерде сақталуы себеп болған. Жоғары температура салдарынан ангардың металл шатыры опырылып, бұл өрт сөндірушілердің жалын ошағына жетуін қиындатқан.
Бірнеше сағатқа созылған операциядан кейін өрт толықтай ауыздықталды. Зардап шеккендер тіркелмеген.
Қазір оқиға орнында өрт сынақ зертханасының мамандары мен анықтау бөлімінің қызметкерлері жұмыс істеп жатыр. Өрттің шығу себебі анықталуда.