RUS
SMARTNEWS.KZ басылымының хабарлауынша, Ақтауда кәсіпорын қызметкері жұмыс орнына «қару мен гранатаға ұқсас заттармен» келіп, арты шуға ұласқан оқиға бойынша қамауға алынды.
Әлеуметтік желіде тараған видеода ер адамның «Интергаз Орталық Азия» компаниясының қызметкері екені айтылып, оның кеңсеге қару мен граната алып келгені көрсетілген.
Маңғыстау облыстық полиция департаментінің мәліметінше, оқиға 30 сәуір күні болған. Ақтау қалалық полициясының жедел басқару орталығына кәсіпорын аумағында гранатаға ұқсас зат ұстаған ер адам жүргені туралы хабарлама түскен.
Оқиға орнына жеткен жедел-тергеу тобы күдіктінің сол мекеменің қызметкері екенін анықтап, одан қару мен гранатаға ұқсас заттарды тәркілеген.
Полицияның алдын ала дерегіне сәйкес, тәркіленген заттар пейнтболға арналған қару мен пиротехникалық бұйым болып шыққан. Құқық қорғау органдары тыйым салынған заттардың табылмағанын хабарлады.
Алайда ер адамның мас күйде болғаны анықталып, полиция бөлімшесіне жеткізілген. Сот оны есірткі заттарын қолданғаны үшін кінәлі деп танып, 10 тәулікке әкімшілік қамауға алған.
Қазір аталған оқиға бойынша тергеу амалдары жалғасып жатыр. Полиция тергеу қорытындысы бойынша тиісті процессуалдық шешім қабылданатынын мәлімдеді.