RUS
SMARTNEWS.KZ басылымының хабарлауынша, Қазақстанда такси қызметіне қатысты талаптар күшейтілді. Ұлттық экономика министрлігі такси тасымалдаушыларына арналған хабарлама беру тәртібіне өзгерістер енгізгенін мәлімдеді.
Жаңа ережеге сәйкес, енді такси қызметін бастамас бұрын тасымалдаушы жергілікті атқарушы органға міндетті түрде хабарлама жолдауы тиіс. Бұған қоса, автопаркке жаңа көлік қосылғанда немесе көлік ауыстырылған жағдайда мәліметті жаңарту мүмкіндігі енгізілді.
Министрлік бұрынғы жүйеде тасымалдаушы нақты бір көлікке бекітілмегенін атап өтті. Соның салдарынан жол апаты болған жағдайда жолаушыларға немесе үшінші тұлғаларға келген шығын үшін нақты жауаптыны анықтау қиындаған.
Осы мәселені шешу үшін хабарлама нысанына көлік туралы нақты деректер енгізілді. Енді тасымалдаушылар көліктің маркасын, мемлекеттік тіркеу нөмірін және шығарылған жылын көрсетуге міндетті.
Ведомствоның мәліметінше, бұл өзгерістер жолаушылар тасымалының қауіпсіздігін күшейтіп, заңсыз жұмыс істейтін такси қызметтерінің үлесін азайтуға бағытталған.
Аталған түзетулер Ұлттық экономика министрінің 2015 жылғы 6 қаңтардағы №4 бұйрығына енгізілген өзгерістер аясында қабылданды.