RUS
SMARTNEWS.KZ басылымының хабарлауынша, кәсіпқой боксшы Жәнібек Әлімханұлы әлемнің үздік боксшыларының жаңартылған pound-for-pound (P4P) рейтингінде мексикалық жұлдыз Сауль Альвареснен озып шықты.
Sports.kz мәліметінше, WBO тұжырымы бойынша орта салмақтағы әлем чемпионы Жәнібек рейтингте алтыншы орынға жайғасқан. Ал «Канело» сегізінші сатыға түскен. Бұған дейін қазақстандық былғары қолғап шебері бесінші орында тұрған еді. Алайда ресейлік Дмитрий Бивол оны бір сатыға ығыстырды.
Әлімханұлының кәсіби мансабындағы көрсеткіші әлі де мінсіз — 17 жекпе-жек, 17 жеңіс. Оның 12-сін нокаутпен аяқтаған. Соңғы рет ол 2025 жылдың сәуірінде француз боксшысы Анауэль Нгамиссенгені техникалық нокаутпен жеңген болатын.
Соған қарамастан, қазақстандық чемпион қазір допинг сынамасына байланысты уақытша жарыстардан шеттетілген. Бірақ WBO ұйымы оның чемпиондық белбеуін сақтап қалды.
Ал «Канело» үшін соңғы кезең сәтсіз өтті. Мексикалық боксшы америкалық Теренс Кроуфордтен жеңіліп, суперорта салмақтағы барлық чемпиондық титулынан айырылды. Кейін шынтағына операция жасатып, рингтен уақытша кеткен.
Boxing Metrics нұсқасындағы үздік ондықта Наоя Иноуэ көш бастап тұр. Одан кейін Александр Усик, Теренс Кроуфорд, Шакур Стивенсон және Дмитрий Бивол орналасқан.
Айта кетейік, бұған дейін Жәнібек доминиканалық боксшы Карлос Адаместің жекпе-жек өткізу туралы мәлімдемесіне әлеуметтік желіде жауап берген еді.