RUS
SMARTNEWS.KZ басылымының хабарлауынша, Щучинскідегі «Центр плова» кафесінде болған жойқын жарылыстан кейін ұсталған мекеме иесінің қамау мерзімі тағы бір айға ұзартылды. Бұл туралы Ақмола облысының прокуратурасы хабарлады.
Бұған дейін, 2026 жылғы 4 наурызда Көкшетау қаласының мамандандырылған тергеу соты кафе иесін екі айға қамауға алу туралы санкция берген болатын. Енді сот шешімімен бұл мерзім тағы бір айға созылды.
Қазіргі уақытта іс Қылмыстық кодекстің 292-бабы 3-бөлігі — «Өрт қауіпсіздігі талаптарын бұзу салдарынан абайсызда екі немесе одан да көп адамның өліміне әкеп соғу» бойынша тергеліп жатыр.
Еске салайық, биыл 26 ақпаннан 27 ақпанға қараған түні Щучинскідегі кафеде газ баллоны жарылған. Алғашында алты адамның қаза тапқаны хабарланған еді. Кейін көз жұмғандар саны тоғызға, артынша 12 адамға жетті.
Жарылыс пен өрттен зардап шеккен бірнеше адам ауыр жағдайда Астанаға жеткізілген. Олардың төртеуі санитарлық авиация арқылы Ұлттық шұғыл медицина үйлестіру орталығына тасымалданса, тағы бірі жерүсті көлігімен жеткізілген.
Қайғылы оқиғадан кейін кафе иесі ұсталып, оған қатысты қылмыстық іс қозғалған. Тергеу амалдары әлі жалғасып жатыр.