RUS
SMARTNEWS.KZ басылымының хабарлауынша, Шымкентте өз балаларын жүйелі түрде қорлап, қатыгездік көрсеткен әйелге қатысты сот процесі жалғасып жатыр. Іс материалдары бойынша, анасы кәмелетке толмаған балаларын ұрып-соғып қана қоймай, денесін ыстық заттармен күйдіріп, өміріне қауіп төндіретін әрекеттер жасаған. Бұл туралы Otyrar.kz жазды.
Сот отырысында балалардың берген жауаптары тыңдалып, қатыгездік белгілері түсірілген бейнематериалдар ұсынылды. Тергеу барысында жиналған деректер отбасы ішінде ұзақ уақыт бойы зорлық-зомбылық болғанын көрсеткен.
Балалардың айтуынша, анасы оларды түрлі сылтаумен жазалап отырған. Соттағы жауап барысында айыпталушы ұлының аузын газға қыздырылған шанышқымен күйдіргенін мойындады. Сондай-ақ баласының темекі шеккенін көрген соң үтікті қыздырып, денесінің бірнеше жерін күйдіргенін растаған.
Судьяның сұрақтарына жауап берген әйел өз кінәсін толық мойындап, істеген әрекетіне өкінетінін айтты.
Іс қоғамда үлкен резонанс тудырған болатын. Жыл басында балаларға көрсетілген зорлық туралы ақпарат жарияланғаннан кейін олар мемлекет қамқорлығына алынған. Қазіргі уақытта балалардың өміріне қауіп жоқ.
Заң бойынша кәмелетке толмағандарға қатысты қатыгездік әрекеттер ауыр қылмыс санатына жатады. Тергеу мен сот процесі жалғасып жатыр.