RUS
SMARTNEWS.KZ басылымының хабарлауынша, Алматыда әйел адам бұрынғы күйеуінің мазасын алып, соңынан қалмай жүргеніне шағымданып, полицияға жүгінген. Іс сотқа дейін жетіп, ер адам жауапқа тартылды.
Қалалық полиция департаментінің мәліметінше, тұрғын құқық қорғау органдарына бұрынғы жұбайының тұрақты түрде қудалап жүргенін айтып арызданған. Осыдан кейін полиция қылмыстық іс қозғап, тергеу жұмыстарын бастаған.
Тергеу барысында ер адамның заңға қайшы әрекеттерін растайтын дәлелдер жиналған. Күдікті жедел түрде ұсталып, уақытша ұстау изоляторына қамалған. Кейін іс материалдары сотқа жолданды.
Сот шешімімен алматылыққа 100 сағат қоғамдық жұмыс жазасы тағайындалып, пробациялық бақылауға алынған.
Медеу аудандық полиция басқармасы өкілдерінің айтуынша, азаматтардың психологиялық жай-күйі мен жеке қауіпсіздігіне нұқсан келтіретін кез келген қудалау әрекетіне құқықтық баға беріледі.