RUS
SMARTNEWS.KZ басылымының хабарлауынша, Астанада Салтанат Нүкенованың ағасы Айтбек Амангелді мен Қуандық Бишімбаевтың әпкесі Аружан Бишімбаева арасындағы сот дауы ішінара аяқталды. Сот әлеуметтік желілерде жарияланған бірқатар мәлімдемені шындыққа сәйкес келмейді деп танып, оларды теріске шығаруды міндеттеді.
Еске салайық, 2024 жылдың мамырында бұрынғы ұлттық экономика министрі Қуандық Бишімбаев азаматтық некедегі жары Салтанат Нүкенованы өлтіргені үшін 24 жылға бас бостандығынан айырылған еді. Алайда бұл қайғылы оқиғадан кейін екі тараптың туыстары арасындағы дау әлі де жалғасып келеді.
Өткен жылы Салтанаттың ағасы Айтбек Амангелді «Ее звали Салтанат» атты естелік кітапты жарыққа шығарған болатын. Осыдан кейін Аружан Бишімбаева әлеуметтік желілерде авторды айыптап, оны трагедияны табыс көзіне айналдыру, хайп жасау және онлайн манипуляцияға бару сияқты уәждермен сынға алған.
Оның жазбаларында Айтбек Амангелдіге қатысты «бауырымды коммерциялық мақсатта пайдаланды», «қысым көрсетілді», «жалған ақпарат таратып отыр» деген мазмұндағы мәлімдемелер болған.
Ұзаққа созылған сот процесі нәтижесінде сот талап арызды ішінара қанағаттандырды. Судья Гүлнұр Сейтхожина Бишімбаеваның бірқатар мәлімдемелерін дәлелденбеген және шындыққа сәйкес емес деп таныды.
Сот шешімі бойынша Аружан Бишімбаевадан сараптама шығындары мен өкілдік қызметтерге кеткен қаражатты өтеу міндеттелді. Сондай-ақ моральдық зиян бойынша да өтемақы өндірілді. Бұған қоса, тараптар арасындағы өзге де даулы тұстар сот қарауында талқыланған.
Айтбек Амангелді бұған дейін аталған мәлімдемелерді нотариалды түрде бекітіп, сотқа жүгінген. Оның айтуынша, жарияланған ақпарат оның ар-намысы мен беделіне нұқсан келтірген. Іске екі сараптамалық қорытынды қоса тіркелген.
Ал жауапкер тарап бұл пікірлерді субъективті бағалау деп санап, олардың дәлелдеуді қажет етпейтін жеке көзқарас екенін алға тартқан. Осыған байланысты сот қосымша сараптама тағайындаған.
Сот сараптамасының қорытындысы кейбір мәлімдемелерде нақты негативті сипат бар екенін растаған. Осылайша, сот істі ішінара қанағаттандыру туралы шешім шығарды. Айта кету керек, бұл шешім әзірге заңды күшіне енген жоқ.
Бұған дейін жарияланған «Ее звали Салтанат» кітабы қоғамда екіұдай пікір туғызған болатын: бір тарап оны естелік еңбек ретінде қабылдаса, екінші тарап жеке трагедияны жария кеңістікке шығару деп бағалаған.