RUS
SMARTNEWS.KZ басылымының хабарлауынша, Ұлыбританиядағы беделді аудандардың бірі — Лондонның Сент-Джеймс ауданында өткен мэр сайлауында Қазақстан тумасы Санжар Әбішев жеңіске жетті. Ол сайлауға Ұлыбританияның Консервативтік партиясы атынан қатысқан.
Дауыс беру қорытындысы бойынша Санжар Әбішев қарсыласынан 350 дауыс артық жинаған. Жалпы сайлауға шамамен 2,3 мың адам қатысқан. Сайлау нәтижесі мен жеңімпаз жарияланған сәттің видеосын қазақстандық кәсіпкер, Kusto Group компаниясының тең құрылтайшысы Қанат Көпбаев әлеуметтік желіде бөлісті.
Көпбаевтың айтуынша, Санжар Әбішев Ұлыбританияда мектеп жасынан бері тұрады. Ол кәсіпкер Азат Әбішевтің ұлы болуы мүмкін екені де айтылды.
«Қазақ отбасынан шыққан, британ элитасында туысы да, ықпалы да жоқ жігіт білімнің, тәртіптің және ұзақ жылғы еңбектің арқасында Лондонның беделді аудандарының біріне мэр болды. Бұл — оның жолының бастауы ғана», — деп жазды Қанат Көпбаев.
Сент-Джеймс — Лондонның тарихи әрі мәртебелі аудандарының бірі саналады. Мұнда ірі бизнес орталықтары, элиталық тұрғын үйлер мен мемлекеттік маңызы бар нысандар орналасқан.
Қазақстандықтардың шетелдегі саяси және қоғамдық ортада көрінуі сирек кездесетін құбылыс болғандықтан, Санжар Әбішевтің жеңісі әлеуметтік желілерде қызу талқыланып жатыр.