RUS
SMARTNEWS.KZ басылымының хабарлауынша, Қазақстанның бірінші ракеткасы Елена Рыбакина Римде өтіп жатқан WTA 1000 санатындағы беделді турнирдегі алғашқы матчын жеңіспен аяқтады.
Қазақстандық теннисші жарысты екінші айналымнан бастап, әлемдік рейтингте 47-орында тұрған грек спортшысы Мария Саккаримен кортта жолықты. Кездесу барысында Рыбакина айқын басымдық танытып, қарсыласын екі сетте 6:4, 6:1 есебімен тізе бүктірді.
Осылайша, қазақстандық спортшы турнирдің үшінші кезеңіне жолдама алды. Айта кетейік, Рыбакина Римдегі жарықта бұған дейін де топ жарған. Ол 2023 жылы осы турнирдің чемпионы атанған болатын.
Биылғы додада да қазақстандық теннисші басты фавориттердің бірі саналады. Ол турнирде екінші нөмірмен тіркелген. Римдегі WTA 1000 жеңімпазы 1 миллионнан астам еуро сыйақы мен 1000 рейтингтік ұпай иеленеді.
Бұған дейін Елена Рыбакинаның Германиядағы турнирде жеңіске жетіп, Porsche Carrera автокөлігі мен 160 мың еуро сыйақы алғаны хабарланған еді.
Сондай-ақ Римдегі ATP Masters 1000 турнирінде Қазақстанның тағы бір теннисшісі Александр Бублик те сәтті өнер көрсетті. Ол аргентиналық Себастьян Баэсті сенімді түрде жеңіп, турнирдің үшінші айналымына өтті.