RUS
SMARTNEWS.KZ басылымының хабарлауынша, АҚШ Қорғаныс министрлігі бұрын құпия сақталған құжаттардың алғашқы топтамасын жариялап, олардың арасында 1994 жылы Қазақстан аумағында байқалған белгісіз ұшатын нысанға қатысты деректер де бар екенін мәлімдеді.
Пентагон сайтының арнайы бөлімінде NASA, FBI және өзге де америкалық ведомстволардың 162 файлы жарияланған. Сол материалдардың ішінде АҚШ Мемлекеттік департаментінің 1994 жылғы дипломатиялық жеделхаты да кездеседі.
Құжатта 1994 жылдың 27 қаңтарында Қазақстан аспанында белгісіз ұшатын нысан байқалғаны айтылған. Нысанды Тәжікстаннан ұшып шыққан ұшақ экипажы көрген. Ұшақ шамамен 12,5 шақырым биіктікте болған.
Куәгерлер қатарында бір тәжік ұшқышы мен АҚШ-тың үш азаматы болған. Олардың сипаттауынша, көкжиектің шығыс бөлігінде өте жарық әрі жоғары жылдамдықпен қозғалған нысан көрінген.
Жеделхатта нысанның бірнеше суреті түсірілгені жазылған. Кадрларда оның 90 градусқа күрт бұрылып, штопор жасап, шеңбер бойымен өте үлкен жылдамдықта қозғалғаны байқалады.
Куәгерлер нысанның сыртқы пішіні ұшып бара жатқан оққа ұқсайтынын жеткізген. Сонымен қатар инверсиялық іздердің шамамен 100 мың фут биіктікте байқалғаны айтылған. Бұл көрсеткіш қарапайым ұшақтар ұшатын деңгейден әлдеқайда жоғары.
АҚШ билігі жарияланған құжаттарда бұл нысанның нақты табиғаты немесе шығу тегі жөнінде ресми қорытынды келтірмеген.