RUS
SMARTNEWS.KZ басылымының хабарлауынша, шахматшы Бибісара Асаубаева әлеуметтік желідегі қысым мен орынсыз пікірлерге қатысты ашық мәлімдеме жасады. Ол Telegram-арнасында аудитория көбейген сайын еркін пікір алмасу қиындап кеткенін айтты.
Шахматшының сөзінше, арнасын шамамен екі жыл бұрын ашқан, ал тұрақты түрде жүргізе бастағанына бір жылдан асқан. Бастапқыда ол бұл платформаны жеке күнделік секілді қабылдап, оқырмандармен еркін әрі шынайы форматта сөйлесіп келген.
Алайда уақыт өте аудитория ұлғайып, бірге негатив те көбейген. Спортшы әсіресе жеке өмірі, достары мен қарым-қатынасына қатысты қажетсіз ақыл айтатын жазылушылардың артқанын жасырмады.
«Мен сұрамаған ақылды айтпаңыздар», — деп жазды Бибісара.
Ол ешкімді өзін жақсы көруге міндеттемейтінін айтып, ұнамайтын дүниені көрсе, жай ғана парақшадан кетуге шақырды. Сонымен қатар Асаубаева арнасындағы жағымсыз пікір қалдыратын қолданушыларды бұғаттайтынын ескертті.
Шахматшының айтуынша, оның Telegram-арнасы әрдайым «саннан бұрын сапаға мән беретін» алаң болып қала береді.