RUS
SMARTNEWS.KZ басылымының хабарлауынша, Көкшетауда тұрғын үй ауласында қайғылы жол апаты болып, бір әйел қаза тапты. Оқиға 9 мамыр күні автотұраққа кіреберісте болған, деп хабарлайды жергілікті полицияға сілтеме жасаған ақпарат көздері.
Бейнебақылау камерасына түскен кадрларда жеңіл көліктің жаяу жүргіншіні қағып кеткені анық көрінеді. Қайғылы оқиғадан кейін Ақмола облыстық полиция департаменті қылмыстық іс қозғап, тергеу амалдарын бастаған.
Марқұмның артында 13 жастағы ұлы қалған.
Тұрғындардың айтуынша, бұған дейін аулаға екі кіреберіс болған. Алайда олардың бірі жабылып, қазір барлық көлік бір ғана жол арқылы қатынайды. Соның салдарынан аула ішіндегі көлік қозғалысы күрт көбейіп, жүргізушілердің көбі жылдамдықты азайтпайтын көрінеді.
Жергілікті халық бірнеше рет коммуналдық қызметтерге қосымша кіреберісті ашып, аумақты қауіпсіз ету туралы өтініш жасағанын айтады. Бірақ әзірге ешқандай нәтиже болмаған. Оқиғадан кейін тұрғындар балалар мен жаяу жүргіншілердің қауіпсіздігіне алаңдап отырғанын жеткізді.