RUS
SMARTNEWS.KZ басылымының хабарлауынша, Алматыда 10 мамыр күні жауған нөсерден кейін бірқатар көше қайтадан су астында қалды. Әлеуметтік желілерде тараған видеоларда көліктердің су кешіп әрең қозғалғаны, ал жаяу жүргіншілердің алып шалшықтарды айналып өтуге мәжбүр болғаны көрінеді.
Қаланың әр ауданынан түсірілген кадрларда арық жүйесінің жауын суын өткізе алмай қалғаны байқалады. Тұрғындар әсіресе кәріз және су бұру инфрақұрылымының әлсіздігіне шағымданды.
Әуезов ауданында болған су басу оқиғаларына аудан әкімдігі пікір білдіріп, арнайы мамандардың жіберілгенін хабарлады.
Ал Рысқұлов даңғылы мен Оңғарсынова көшесі қиылысындағы жағдайға қатысты Алатау ауданы әкімдігі түсініктеме берді. Ведомство мәліметінше, су тасқыны Қарғалы өзені арнасын қайта жаңарту жұмыстарына байланысты туындаған.
Әкімдік өкілдерінің айтуынша, мердігер ұйым өзен арнасы маңындағы өткелді уақытша жапқан. Соның салдарынан су арна арқылы өте алмай, көшелерге жайылған.
Сонымен қатар Ақсу көшесінің тұрғыны жауыннан кейін үйін су басқанын айтты. Бейнежазбада бөлмелердің ішіне дейін су кіргені көрінеді.
Алатау аудандық әкімдігі бұл көшеде бұрын мүлде болмаған арық жүйесі қазір салынып жатқанын мәлімдеді.
Қала әкімдігі синоптиктер болжамына сәйкес жауын-шашын 12 мамыр түске дейін жалғасуы мүмкін екенін ескертті. Сондай-ақ 11 мамырда жел күшейетіні хабарланды.
Әкімдік мәліметінше, ықтимал су басулардың алдын алу үшін коммуналдық қызметтер тәулік бойы кезекшілікке көшкен. Қала бойынша жүзден астам арнайы техника, мотопомпалар, су сору көліктері мен жүздеген жұмысшы жұмылдырылған.