RUS
SMARTNEWS.KZ басылымының хабарлауынша, Көкшетауда жалғызбасты ананың өліміне әкелген жол апаты бойынша тың дерек шықты. Әйелді қағып кеткен жүргізушінің көлік басқаруға мүлде құқығы болмағаны белгілі болды.
Ақмола облыстық полиция департаментінің мәліметінше, қайғылы оқиғаға байланысты екі бірдей қылмыстық іс қозғалған. Тергеу барысында көлік тізгінінде отырған әйелдің жүргізуші куәлігі жоқ екені және ешқашан көлік жүргізу курстарынан өтпегені анықталған.
Қазір оған адам өліміне соқтырған жол қозғалысы ережесін бұзу фактісі бойынша тергеу жүріп жатыр. Ал көліктің иесі саналатын күйеуіне көлік басқару құқығы жоқ адамға рөл бергені үшін қылмыстық іс тіркелді. Бұл бап бойынша бас бостандығынан айыру жазасы да қарастырылған.
11 мамыр күні Көкшетау қаласының мамандандырылған тергеу соты күдікті әйелді үйқамаққа алу туралы шешім шығарды.
Полиция бұл істің тергеуі ведомство басшылығының ерекше бақылауында екенін мәлімдеді.
Еске салсақ, бұған дейін әлеуметтік желілерде Көкшетаудағы шағынаудандардың бірінде болған өлімге әкелген апаттың видеосы тараған еді. Кадрларда жол талғамайтын көлік бұрылыста әйелді қағып кетіп, тоқтағаны байқалады. Ал жәбірленуші көліктің астында қалған.