RUS
SMARTNEWS.KZ басылымының хабарлауынша, Алматы хантавирусының таралу қаупіне дайын ба? Бұл сұраққа қалалық Санитариялық-эпидемиологиялық бақылау департаменті жауап берді.
Алматы қаласы СЭБД-нің аса қауіпті инфекцияларды эпидемиологиялық қадағалау бөлімінің басшысы Жайдаркүл Отарбекова хантавирус жаңа инфекция емес екенін айтты. Оның сөзінше, мұндай вирустың Алматыға немесе өзге өңірлерге сырттан келу қаупі әрдайым сақталады.
– Инфекцияның тасымалдану қаупі үнемі бар. Сондықтан әуежайлар мен шекаралық бақылау аймақтарында тұрақты профилактикалық жұмыстар жүргізіледі. Барлық әуежайларда вирустық инфекцияларды ерте анықтауға арналған бақылау жүйелері орнатылған. Бұл індеттің таралуының алдын алуға мүмкіндік береді, – деді ол өңірлік коммуникациялар қызметіндегі брифингте.
Маманның айтуынша, жұмыс арнайы кешенді жоспар негізінде жүргізіледі. Қалада инфекциялық стационарлар, оқшаулау бөлімдері және жедел әрекет ететін инфекционист мамандар жеткілікті.
– Егер аса қауіпті инфекцияға күдік туындаса, барлық қызметтер бірден іске қосылады. Науқастар оқшауланып, емдеу инфекциялық стационарда жүргізіледі, – деді Жайдаркүл Отарбекова.
Сонымен қатар ол хантавирусқа қарсы әзірге вакцина жоқ екенін атап өтті.