RUS
SMARTNEWS.KZ басылымының хабарлауынша, Израиль парламенті 2023 жылдың 7 қазанында ХАМАС жасаған жаппай шабуылдар мен кепілге алу оқиғаларына қатысы бар тұлғаларға өлім жазасын қолдануға және ашық сот процестерін өткізуге мүмкіндік беретін заң жобасын мақұлдады.
Израиль Кнессетінде өткен дауыс беруде құжатты 93 депутат қолдап, қарсы дауыс берілмеген. Барлығы 120 орындық парламентте 27 депутат не қалыс қалған, не дауыс беруге қатыспаған.
Жаңа заңға сәйкес, арнайы трибунал Иерусалимде жұмыс істейді. Оның отырыстары ашық форматта өтіп, аудио және бейнежазбаға түсіріледі, ал негізгі тыңдаулар арнайы онлайн-платформада тікелей эфирде көрсетіледі. Сот құрамына қолданыстағы немесе отставкадағы аудандық сот судьялары кіреді.
Құжатта сондай-ақ сотталушылардың құқықтық қорғауына кететін шығындар Палестина автономиясына бөлінетін қаржы есебінен өтелуі мүмкін екені көрсетілген. Бұл механизм Батыс жағалаудағы әкімшіліктің 7 қазан оқиғаларына қатысы болмағанына қарамастан қарастырылған.
Заң жобасының түсіндірмесінде оның мақсаты ХАМАС пен оған қатысы бар топтардың Израиль азаматтарына қарсы жасаған шабуылдары, кісі өлтіру, зорлық-зомбылық және кепілге алу фактілері бойынша жауаптыларды сотқа тарту екені айтылған.
Заң авторларының бірі Юлия Малиновская бұл шешім Израильдің егемен мемлекет ретінде өзіне зиян келтіргендерге жауап беруге қабілетті екенін көрсетуге бағытталғанын мәлімдеді.
Алайда құқық қорғаушылар жаңа заң өлім жазасының қолданылуын жеңілдетіп, әділ сот құқығына нұқсан келтіруі мүмкін екенін ескертіп отыр.
7 қазан 2023 жылғы шабуыл Израиль тарихындағы ең қанды күндердің бірі болды. ХАМАС содырлары 1200-ден астам адамды өлтіріп, 251 адамды кепілге алған. Бұл оқиғалар Газа секторындағы кейінгі ауқымды соғысқа түрткі болып, 72 мыңнан астам адамның қаза болуына әкелді.