RUS
SMARTNEWS.KZ басылымының хабарлауынша, Атырауда «Қазақстан темір жолы» филиалы басшысы Аралбай Қосымбаевтың кабинетінде шкафтың артында орналасқан жасырын бөлме анықталып, бұл жайт әлеуметтік желіде қызу талқыланды.
Соңғы күндері блогерлер мен желі қолданушылары ҚТЖ филиалы басшысының қабылдау бөлмесіне бірнеше рет барып, онымен кездесуге талпынған. Алайда ұзақ күткеніне қарамастан, басшымен жолыға алмаған олар кабинетке өз бетімен кірген.
Сол сәтте блогерлердің бірі кабинеттегі үлкен шкафқа назар аударып, оны ашып көруді ұйғарған. Нәтижесінде шкафтың артында басқа бөлмеге апаратын жасырын есік бары белгілі болған. Бірақ есік құлыптаулы тұрған.
Кейінірек Аралбай Қосымбаев аталған бөлмені өзі көрсетіп, оның ішін таныстырған. Кадрлардан бөлме ішінде турник, бос шкаф және санитарлық торап қана бары байқалған. Әлеуметтік желіде тараған болжамдарға қарамастан, онда сән-салтанат белгілері немесе қымбат интерьер табылмаған.
Соған қарамастан, желі қолданушылары блогерлер шкафты алғаш ашқан сәт пен ресми көрсетілім арасында уақыт өткеніне назар аударды. Осыған байланысты кейбірі бөлменің бастапқы көрінісі өзгертілуі мүмкін деген күмәнін жасырмады.
Айта кетейік, бұған дейін Семейдегі «Семей машина жасау зауыты» АҚ директорының кабинетінде де шкафтардың артында жасырын бөлмелер бары туралы видео тараған болатын. Бөлмелердің бірінен бильярд үстелі табылып, қоғамда үлкен талқы туғызған еді.
«Қазақстан инжиниринг» ұлттық компаниясының мәліметінше, аталған кәсіпорынның 2015 жылдан бері жинақталған шығыны шамамен 1,9 млрд теңгені құрайды, ал кредиторлық берешек көлемі 3 млрд теңгеге жеткен.