RUS
SMARTNEWS.KZ басылымының хабарлауынша, Маңғыстау облысында мерзімді әскери қызмет сарбазының қазасына байланысты әскери бөлім командиріне қатысты қылмыстық іс сотқа жолданды. Бұл туралы Бас әскери прокуратура мәлімдеді.
Ведомствоның хабарлауынша, Ақтау гарнизонындағы әскери бөлімдердің бірінің командирі қызметтік міндетіне салғырт қарады деген күдікке ілінген. Тергеу нұсқасы бойынша, дәл осы немқұрайдылық 17 ақпанда болған қайғылы оқиғаға себеп болған.
Прокуратура мәліметіне сәйкес, бөлім командирі жеке құрамды бақылау мен қарумен жұмыс істеу тәртібін қамтамасыз етуге қатысты жарғылық талаптар мен ведомстволық бұйрықтарды толық орындамаған. Соның салдарынан сарбаз Жайғалиев Р. атыс кезінде өлімге әкелген жарақат алған.
Іс бойынша әскери прокурорлардың бақылауымен жедел-тергеу тобы жұмыс жүргізіп, қажетті дәлелдер мен сараптамалар қысқа мерзімде жинақталған.
Тергеу аяқталған соң қылмыстық іс мәні бойынша қарау үшін сотқа жіберілді.
Сонымен қатар оқиғадан кейін барлау-шабуылдау батальонының командирі, оның орынбасары және рота командирі қызметтерінен босатылған. Бұдан бөлек, 10 лауазымды тұлға тәртіптік жауапкершілікке тартылды.
Еске салайық, 17 ақпанда «Бейнеу» полигонында жоспарлы далалық атыс жаттығулары кезінде Құрлық әскерлерінің «Батыс» өңірлік қолбасшылығына қарасты мерзімді қызмет сарбазы қарумен жұмыс барысында оқ жарақатын алып, оқиға орнында көз жұмған еді. Аталған істі Бас прокуратура ерекше бақылауға алған болатын.