RUS
Алматы әкімдігі таратқан мәліметке сәйкес, Ерболат Досаевтың тапсырмасы бойынша былтырдан бері соғыс ардагерлері жалпы практика дәрігерлері мен арнайы мамандардың кеңейтілген тексеруінен өтіп тұрады. Сондай-ақ жалпы клиникалық талдауларды тегін тапсырып, электрокардиография, ультрадыбыстық зерттеу, магниттік-резонанстық томография мен компьютерлік томографиядан өтеді. Бұдан бөлек, ардагерлер мен оларға теңестірілген адамдарға стационарда оңалту, санаторий-курорттық емдеу және стоматологиялық көмек көрсетіледі.
Жыл басынан бері 673 адамға тіс протездеу қызметі көрсетілді. Осы мақсаттар үшін соғыс ардагерлерінің қалалық емханасына 2023 жылға Алматы бюджетінен 27 млн теңге бөлінді.
«2023 жылдың басынан бері тегін медициналық көмектің кепілдік берілген көлемі және міндетті әлеуметтік медициналық сақтандыру аясында Екінші дүниежүзілік соғыстың 3243 қатысушысы және оларға теңестірілген адамдар кеңейтілген медициналық тексеруден өтті. Жыл соңына дейін осы санаттағы алматылықтардың 100% - ы кеңейтілген медициналық тексеруден өтеді»,- деп хабарлады қалалық әкімдіктен.
Сонымен қатар, өздігімен жүре алмайтын науқастарды ай сайын учаскелік дәрігерлер немесе медбикелер тексереді. Дәрі-дәрмектерді үйге тегін жеткізу ұйымдастырылды. Жыл соңына дейін 3900-ден астам өздігінен қозғала алмайтын пациент үйінде толық медициналық тексеруден өтеді.
Барлық медициналық ұйымдарда қарт жауынгерлер мен оларға теңестірілген адамдарға үнемі естелік сыйлықтар мен азық-түлік салынған дорба тапсырылады.
Сондай-ақ, Алматы әкімінің тапсырмасы бойынша әлеуметтік қызмет мамандары ардагерлерді тұрақты аралайды, соның нәтижесінде оларға қандай көмек қажет екенін анықтайды және оны атаулы түрде көрсетеді.
- Жөндеу және монтаждау жұмыстары;
- Тұрмыстық құрылғыларды алуға көмек көрсетіледі;
- Материалдық көмек;
- Заңгерлік және басқа көмек.
Мысалы, Наурызбай ауданының ардагерінің кіреберісінің ағаш терезелері жаңасына ауыстырылып, есігінің алдына асфальт төселді.
Алатау ауданының ардагеріне 1,5 млн теңгеге су құбыры мен кәріз желісін тарту жұмыстары жүргізілді. Өтініштер әртүрлі және ешқайсысы назардан тыс қалмайды.
Аға буын алматылықтардың өмір сүру сапасы мен ұзақтығын жүйелі түрде арттыру үшін мегаполисте 50 мыңнан астам адамға тегін әлеуметтік қызмет көрсететін белсенді ұзақ өмір сүрудің 9 орталығы жұмыс істейді. 2023 жылы тағы бір осындай орталық ашу жоспарда.