RUS
SMARTNEWS.KZ басылымының хабарлауынша, Қазақстанның халық әртісі Мақпал Жүнісова әлеуметтік желіде тараған пікірлерге жауап беріп, әріптесі Роза Рымбаева айтқан сөздердің өзіне қатысы жоқ екенін мәлімдеді.
Әншінің айтуынша, желі қолданушылары Роза Рымбаеваның сұхбатындағы «Кейбір әншілердің концертіне халықты күштеп кіргізеді» деген пікірін Мақпал Жүнісованың шығармашылық кештерімен байланыстыра бастаған. Осыдан кейін әлеуметтік желілерде «Мақпалдың концертіне көрерменді мәжбүрлеп апарады» деген әңгіме тараған.
Мақпал Жүнісова мұндай ақпаратты ашық түрде жоққа шығарды. Ол өмірінде әкімдікке барып концерт ұйымдастырып беруді сұрамағанын айтып, өз кештеріне халықтың ерікті түрде келетінін жеткізді.
«Менің концертіме халық өзі келеді. Өтірікті шындыққа жанастырып айтсаңдаршы», – деді әнші.
Өнер иесі тіпті гастрольдік сапарларға бірге еріп барып, көрерменнің өз еркімен келетінін тексеруге болатынын айтты. Оның сөзінше, әкімдік арқылы зал толтыру тәжірибесі оның шығармашылығында болған емес.
Сонымен қатар Мақпал Жүнісова Роза Рымбаева мұндай пікір айтқанда нақты кімдерді меңзегенін ашық атауы керек еді деген ойын жеткізді.
Айта кетейік, бұған дейін Роза Рымбаева сұхбаттарының бірінде сахнадан уақытында кеткен дұрыс екенін айтқан болатын. Әнші денсаулық әлсіреп, жас ұлғайғанда көрермен алдында жүруді дұрыс санамайтынын жеткізіп, болашақта шығармашылықпен қоштасу жоспары барын мәлімдеген.