Астаналықтар дәмханаларда иттің етін жеп келген – Зооқорғаушылар дабыл қақты

SMARTNEWS.KZ басылымының хабарлауынша, Қазақстандағы кейбір мейрамханаларда келушілерге ит еті аралас тағам ұсынылған болуы мүмкін. Мұндай мәлімдеме блогер Тимур Балымбетовтің «Честно Говоря» подкастында айтылды.

Бағдарлама қонақтары — зооқорғаушы әрі блогер Темірлан Тоспаев пен «Аmanat» партиясы жанындағы республикалық экологиялық кеңестің мүшесі Сергей Снегирёв қоғамдық тамақтану саласында күмәнді ет өнімдерінің қолданылғанын мәлімдеді.

Сергей Снегирёвтің айтуынша, екі жыл бұрын Астанада қоғамдық тамақтану орындарына ет өнімдерін жеткізуге қатысты іс сотта қаралған. Оның сөзінше, мәселе корей асханасына емес, ірі көлемде дайындалған өнімдердің мейрамханаларға жөнелтілуіне байланысты болған.

Ол кейбір танымал мейрамханалар мен франшизаларға сапасы күмән тудыратын аралас фарш жеткізілген болуы мүмкін екенін айтты. Белсендінің сөзінше, мұндай өнімдердің құрамында тағам өндірісіне арналмаған бөгде қоспалар болған.

Осыған ұқсас жағдай 2023 жылдың 20 ақпанында тіркелген. Сол кезде жануарларға қатыгездік көрсету фактісі бойынша қылмыстық іс қозғалған еді. Тергеу дерегіне сәйкес, Шортанды ауданындағы 41 жастағы ер адам қаңғыбас иттерді ұстап, сойып, етін сатып келген.

Тінту барысында шамамен 750 келі ет өнімі тәркіленген. Тергеу мәліметінше, сол еттің бір бөлігі Астанадағы дәмханалардың біріне өткізілуі мүмкін болған. Кейін аталған кафе шамамен 150 келі өнім сатып алғанын растаған.

Белгілі болғандай, күдікті бұған дейін ветеринария саласында жұмыс істеген. Қылмыстық іс материалдары қысқа мерзім ішінде сотқа жолданып, 2023 жылғы 26 маусымда сот оған 200 АЕК көлемінде, сол кездегі есеппен 690 мың теңге айыппұл салған.

Подкаст барысында Темірлан Тоспаев тағы бір даулы мәселеге назар аударды. Оның айтуынша, Қазақстан өңірлерінің бірінде қаңғыбас иттерді аулау тендерін ет өңдеумен айналысатын кәсіпорын жеңіп алған.

Айта кетейік, 2026 жылдың мамырында Батыс Қазақстан облысы Орал қаласында қаңғыбас жануарларды аулау бойынша 9,3 миллион теңгелік келісімшартты шынымен де «Өркен» ЖШС атты ет өңдеу кәсіпорны ұтып алғаны белгілі болды.