Жетісуда жоғалған баланың мәйіті Қаратал өзенінен табылды
Полиция бірнеше сағат іздеген баланың денесі таңға қарай өзеннен табылғанын мәлімдеді.
SMARTNEWS.KZ басылымының хабарлауынша, Жетісу облысында бірнеше сағат бойы ізделген баланың денесі Қаратал өзенінен табылды.
26 мамыр күні таңғы сағат 05:00 шамасында жүргізілген ауқымды іздеу жұмыстары кезінде Қаратал өзенінен бұрын хабар-ошарсыз кеткен кәмелетке толмаған баланың мәйіті табылған.
Алдын ала мәлімет бойынша, баланың денесінен зорлық-зомбылық белгілері анықталмаған. Қазір полиция қызметкерлері оқиғаның барлық мән-жайын тексеріп жатыр.
Құқық қорғау органдары ата-аналарға балалардың қауіпсіздігіне мұқият болуды және оларды қараусыз қалдырмауды ескертті.
Еске салайық, 25 мамыр күні сағат 19:50-де «102» арнасына 2019 жылы туған Данияр Айбек есімді баланың жоғалғаны туралы хабарлама түскен. Мәліметке сәйкес, бала сағат 19:30 шамасында үйден шығып кетіп, қайта оралмаған. Сондай-ақ оның даму ерекшелігі болғаны айтылған.
Материал авторы
