RUS
Жаңа жоба жас мұғалімдерге, дәрігерлерге, мейірбикелерге, мәдениет қызметкерлеріне, спортшыларға, жаттықтырушыларға, журналистерге, университет оқытушыларына, ғылыми, әлеуметтік және коммуналдық мекеме қызметкерлеріне жеке баспана алу үшін жеңілдетілген заем алуға мүмкіндік береді.
Бағдарлама бойынша үміткер жасы 35-тен аспауы керек. Бағдарламаға қатысушылардың таңдаған саладағы ресми жұмыс өтілі, өтініш берген кезде, соңғы бір жылдан кем болмауы тиіс. Сондай-ақ, бағдарламаға қатысушы мен оның отбасы мүшелерінің соңғы 5 жыл ішінде жылжымайтын мүлкі болмауы шарт.
«Екінші жыл қатарынан Қарағанды облысының әкімдігі «Отбасы банкімен» бірге жастарға арналған жеке тұрғын үй бағдарламасын іске асырып келеді. Облыс әкімдігі осылайша жас мамандарға қолдау көрсетуді жөн көрген. Былтыр жобаны жүзеге асыруға жергілікті әкімдік 1 млрд теңге, ал «Отбасы банк» 500 млн теңге бөлген болатын. Аталмыш бағдарлама көмегімен 100-ге жуық адам баспаналы болды. Биыл да қаржыландыру сол тәртіппен жүзеге асады, жаңа қоныс иелерін асыға күтеміз», - дейді «Отбасы банк» АҚ Қарағанды облыстық филиалының директоры Бауыржан Жуаспай.
Жаңа тұрғын үй бағдарламасына қатысу туралы өтініштер мамыр айының 2-12 аралығында жалғасады. Үміткерлер қалалық әкімдікке барулары қажет. Жұмыс уақыты 9:00-ден 18:00-ге дейін, түскі асқа үзіліс 13:00-ден 14:30-ға дейін.
Өтініштерді қабылдау аяқталғаннан кейін, мемлекеттік және қоғамдық өкілдер мен депутаттардан құралған комиссия мүшелері қатысушыларды іріктеп, тізімді «Отбасы банкіне» жолдайды. Банкте үміткер төлем қабілеттілігін тексеріп, нарықтан пәтер табуы қажет. Баспананы Қарағанды қаласында орналасқан бірінші немесе екінші нарықтағы нысандардан таңдап алуға болады.
Тұрғын үй сатып алуға «Отбасы банк» 20 млн теңгеге дейін заем береді (егер мүліктің құны 20 млн теңгеден асатын болса, сатып алушы айырмашылықты өз қаражаты есебінен төлей алады). Бастапқы жарна – 10%, несие бойынша сыйақы мөлшерлемесі – жылдық 5% (ЖТСМ 5,2%), несиенің төлем мерзімі – 19 жылға дейін.