Қазақстан Ресей мұнайын Қытайға тасымалдаудан 250 млн доллар табыс табуы мүмкін
Энергетика министрі жаңа келісім Қазақстанның транзиттік әлеуетін күшейтетінін мәлімдеді.
SMARTNEWS.KZ басылымының хабарлауынша, Қазақстан Ресей мұнайын Қытайға тасымалдау арқылы алдағы он жылда қосымша 250 млн доллар табыс табуды жоспарлап отыр. Бұл туралы Энергетика министрі Ерлан Ақкенженов Жоғары Еуразиялық экономикалық кеңес отырысының кулуарында мәлімдеді.
Министрдің айтуынша, Ресей мұнайын Қытайға жеткізу көлемін ұлғайту туралы жаңа келісім Қазақстанның транзиттік мүмкіндігін арттырады. Құжатқа сәйкес, енді Қытай бағытына қосымша 2,5 млн тонна ресейлік мұнай Қазақстан аумағы арқылы тасымалданады.
– Кеше тиісті келісімге қол қойылды. Ресей мұнайын Қытайға қосымша 2,5 млн тонна көлемінде жеткізу көзделіп отыр. Бұл Қазақстанның транзиттік әлеуетін нығайтып қана қоймай, ел бюджетіне қосымша табыс әкеледі. Алдағы 10 жыл ішінде шамамен 250 млн доллар түсім күтіледі, – деді министр.
Бұған дейін Сауда және интеграция министрлігі 2026 жылдың алғашқы тоқсанында Қазақстанның сыртқы сауда айналымы 10,5 пайызға өсіп, 32,9 млрд доллардан асқанын хабарлаған еді.
Осы кезеңде Қытай Қазақстан экспортының ең ірі сатып алушысына айналса, Ресей Еуразиялық экономикалық одақ ішіндегі саудада негізгі жеткізуші ел мәртебесін сақтап қалды.
Материал авторы
