ШҚО әкімі Сақтағанов орынбасарының жемқорлығынан кейін отставкаға өтініш берді
Жемқорлық үшін сотталған орынбасарының ісі облыс әкімін заң бойынша отставкаға өтініш жазуға мәжбүр етті.
SMARTNEWS.KZ басылымының хабарлауынша, Шығыс Қазақстан облысының әкімі Нұрымбет Сақтағанов бірінші орынбасарының жемқорлық ісі бойынша сот үкімі заңды күшіне енгеннен кейін қызметінен кету туралы өтініш жазды. Алайда оның отставкасы қабылданған жоқ.
Облыс әкімінің баспасөз хатшысы мәлімдегендей, қолданыстағы заңнама талаптарына сәйкес Сақтағанов белгіленген тәртіппен отставкаға өтініш берген. Бірақ өтініш қаралған соң, оның қылмыстық іске қатысы жоқ екені ескеріліп, қызметтен босату туралы өтініш қанағаттандырылмаған.
Осылайша, облыс әкімі өз қызметін бұрынғыдай жалғастыра береді.
Қазақстан заңнамасына сәйкес, облыс әкімдерінің тікелей орынбасарлары, аппарат басшылары немесе аудан әкімдері сыбайлас жемқорлық қылмысы үшін кінәлі деп танылса, өңір басшысы отставкаға өтініш беруге міндетті.
Жақсылық Омар қандай іс бойынша сотталды?
Биыл 3 сәуірде Өскемен қаласының қылмыстық істер жөніндегі мамандандырылған ауданаралық соты облыс әкімінің бірінші орынбасары болған Жақсылық Омар 6 жылға бас бостандығынан айырған еді. Жуырда апелляциялық сот бұл үкімді өзгеріссіз қалдырып, шешім заңды күшіне енді.
Сот үкіміне сәйкес, бұрынғы шенеуніктің Toyota Camry автокөлігі тәркіленді және оған өмір бойы мемлекеттік қызметте жұмыс істеуге тыйым салынды. Прокуратура оның амнистияға немесе шартты түрде мерзімінен бұрын босатуға ілігу мүмкіндігі жоқ екенін мәлімдеді.
Іс материалдары бойынша айып екі негізгі эпизодқа негізделген.
Бірінші жағдайда, Жақсылық Омар Өскемен қаласының әкімі болған кезде танысын қалаға «демеушілік көмек» ретінде Toyota Camry 75 көлігін рәсімдеуге көндірген. Кейін көлік үшінші тұлғалардың атына аударылып, trade-in бағдарламасы арқылы шенеуніктің жеке пайдалануына арналған жаңа автокөлікке айырбасталған. Тергеу бұл әрекеттен мемлекетке 13 миллион теңге көлемінде шығын келгенін анықтады.
Екінші эпизодта экс-шенеунік қарамағындағы қызметкерден «жалпы қамқорлығы» үшін 20 миллион теңге талап еткен. Қызметкер бұл туралы ҰҚК-ге хабарлағаннан кейін, Омар 6 миллион теңгенің алғашқы бөлігін алу кезінде ұсталған.
Соттағы соңғы сөзінде ол кінәсін толық мойындап, өкініш білдірген. Тіпті айыппұл төлеу үшін қарызға батуға дайын екенін айтып, өзін түрмеге қамауды сұрамаған. Дегенмен сот қатаң жаза тағайындады.
Жақсылық Омар туралы не белгілі?
Жақсылық Омар ұзақ жылдар бойы Шығыс Қазақстандағы ықпалды шенеуніктердің бірі саналды. Әр жылдары облыстық ішкі саясат және мәдениет басқармаларын басқарды, облыс әкімінің орынбасары қызметін атқарды.
2018-2024 жылдары Өскемен қаласының әкімі болды. Ал 2025 жылдың сәуірінде Шығыс Қазақстан облысы әкімінің бірінші орынбасары болып тағайындалған. Бұл қызметте 2026 жылғы ақпандағы резонансты ұсталғанға дейін жұмыс істеді.
Материал авторы
