Түркістан облысында екі бала суға кетіп қаза тапты
6 және 13 жастағы балалар суға кетіп, денесі бір тәуліктен соң табылды.
SMARTNEWS.KZ басылымының хабарлауынша, Түркістан облысында қайғылы оқиға болып, суару каналына құлаған екі бала көз жұмды. 6 және 13 жастағы жеткіншектердің денелері іздеу жұмыстары басталғаннан кейін бір тәулік өткен соң табылды.
Оқиға Еңбекші ауылында болған. Алдын ала мәлімет бойынша, балалар суару каналына құлап кетіп, өз күштерімен жағаға шыға алмаған.
Оқиға туралы хабар түскеннен кейін ауқымды іздестіру-құтқару жұмыстары ұйымдастырылды. Іздеуге 73 құтқарушы жұмылдырылды. Бір тәулікке созылған операция барысында екі баланың денесі судан шығарылды.
Қазір қайғылы жағдайдың барлық мән-жайын анықтау үшін тергеу жүргізіліп жатыр. Полиция қызметкерлері оқиғаның себептерін тексеруде.
Төтенше жағдайлар департаменті ата-аналарды балаларды су айдындары мен каналдардың маңында қараусыз қалдырмауға шақырды.
Ведомствоның мәліметінше, 2026 жылдың басынан бері Түркістан облысында суға кетудің 16 дерегі тіркелген. Оның 12-сі кәмелетке толмағандарға қатысты болған.
Түркістан облыстық ТЖД инженері Фуркат Жолдасовтың айтуынша, өңір тұрғындары мен қонақтары кішкентай балаларды су жағасына жалғыз жібермеуі керек.
Құтқарушылардың мәліметінше, судағы қайғылы оқиғалардың басым бөлігі ересектер бақылауының болмауы мен қауіпсіздік талаптарының сақталмауынан болады.
Материал авторы
