Әлем чемпионатының жұлдызы атанған Возиньяның анасын АҚШ-қа кіргізбей қойған
Возиньяның тарихи ойынын анасы көре алмағаны үшін іске АҚШ Конгресі араласты.
SMARTNEWS.KZ басылымының хабарлауынша, 2026 жылғы әлем чемпионатында жарқыраған ойын көрсеткен Кабо-Верде құрамасының қақпашысы Возиньяның анасы АҚШ аумағына кіре алмай қалды. Бұл жағдайдан кейін АҚШ Конгресі оның келесі кездесуге қатысуына мүмкіндік беруді сұрап, билікке үндеу жасады. Бұл туралы Azattyq Rýhy басылымы жазды.
АҚШ Өкілдер палатасындағы демократиялық азшылық жетекшісі Хаким Джеффрис Мемлекеттік хатшы Марко Рубиоға хат жолдап, Кабо-Верде ұлттық құрамасының қақпашысы Возиньяның анасына виза рәсімдеуге көмектесуді сұрады.
Бұған дейін 40 жастағы футболшының анасы АҚШ-қа кіру кезінде қиындықтарға тап болып, ұлы ойнаған 2026 жылғы әлем чемпионатындағы Испанияға қарсы тарихи матчты стадионнан тамашалай алмаған.
Кездесу күтпеген жерден 0:0 есебімен аяқталды. Матчтың басты қаһармандарының бірі Возинья болды. Ол жеті рет қауіпті соққыны қайтарып, ойынның үздік футболшысы атанды.
Хаким Джеффристің айтуынша, Кабо-Верде құрамасы қақпашының тамаша өнері арқылы футбол әлемін таңғалдырды. Конгрессмен ешбір ана баласының тарихи жетістігін көру мүмкіндігінен айырылмауы керек екенін атап өтті.
Ол АҚШ билігі Возиньяның анасына команданың келесі ойынына қатысуға мүмкіндік береді деген үміт білдірді.
Испанияға қарсы кездесуден кейін қақпашының танымалдығы күрт өсті. Бұған дейін оның Instagram парақшасына шамамен 50 мың адам жазылса, екі тәулікке жетпей оқырмандар саны 11 миллионға жуықтаған.
Кабо-Верде құрамасы әлем чемпионаты топтық кезеңіндегі келесі ойынын 22 маусымда Уругвайға қарсы өткізеді.
Материал авторы
