Өзбекстанның әлем чемпионатындағы алғашқы матчы: Үш гол соғылған тартысты кездесу болды

SMARTNEWS.KZ басылымының хабарлауынша, Өзбекстан футбол құрамасы 2026 жылғы әлем чемпионатындағы алғашқы кездесуінде Колумбия командасынан жеңіліс тапты. Бұл матч өзбек футболы үшін тарихи оқиғаға айналды, себебі ұлттық құрама әлем біріншілігінде алғаш рет алаңға шықты.

Кездесу Мексиканың Мехико қаласындағы «Ацтека» стадионында К тобының алғашқы турында өтті. Ойынның бас төрешісі Англия өкілі Энтони Тейлор болды.

Бірінші таймда Колумбия құрамасы есеп ашты. 40-минутта қорғаушы Даниэль Муньос Луис Диастың нәтижелі пасынан кейін өз командасын алға шығарды.

Екінші тайм басталғаннан кейін Өзбекстан құрамасы есепті теңестіре алды. Аббосбек Файзуллаев қарсылас қақпасынан саңылау тауып, тарихи матчтағы өз командасының алғашқы голын соқты.

Сурет: Ryan Pierse/FIFA/Getty Images

Алайда өзбектер тең нәтижені сақтап қала алмады. Көп ұзамай Луис Диас өзі гол соғып, Колумбияны қайтадан алға шығарды. Кездесудің соңына қарай Хаминтон Кампас үшінші допты енгізіп, матчтың соңғы есебін белгіледі.

Осылайша Колумбия құрамасы топтан шығу жолындағы маңызды үш ұпайға қол жеткізді. К тобының құрамында Колумбия мен Өзбекстаннан бөлек, Португалия және Конго Демократиялық Республикасы құрамалары өнер көрсетеді.

2026 жылғы әлем чемпионаты АҚШ, Канада және Мексика аумағында өтіп жатыр. Турнир 11 маусымда басталып, 19 шілдеде финалдық матчпен аяқталады.

Биылғы әлем чемпионатында төрт құрама алғаш рет бақ сынауда. Олар — Иордания, Кабо-Верде, Кюрасао және Өзбекстан құрамалары.

Тарихи матч қарсаңында Өзбекстан билігі мемлекеттік мекемелердегі жұмыс уақытын кейінге шегерген. 18 маусымда елдегі мемлекеттік ұйымдардағы жұмыс күні әдеттегіден екі сағат кеш, сағат 10:00-де басталады.