Қазақстан екі жылда жеті әлем чемпионатын өткізетін болды

SMARTNEWS.KZ басылымының хабарлауынша, Қазақстан 2026-2027 жылдары жеті бірдей әлем чемпионатын өткізу құқығына ие болды. Бұл – еліміздің спорт инфрақұрылымы мен ұйымдастырушылық әлеуетінің халықаралық деңгейде мойындалғанын көрсететін маңызды жетістік.

Биыл қазан айында Қазақстан күрес түрлерінен әлем чемпионатын қабылдайды. Ал 2027 жылы Астанада олимпиадалық спорт түрлері бойынша үстел теннисінен, дзюдодан, бокстан, таеквондодан, сондай-ақ киберспорт пен шорт-тректен жасөспірімдер арасындағы әлем чемпионаттары ұйымдастырылады.

Ірі халықаралық жарыстарды өткізу құқығына ие болу – Мемлекет басшысының спортты дамыту, елдің халықаралық беделін арттыру және Қазақстанды өңірдегі жетекші спорт орталықтарының біріне айналдыру жөніндегі тапсырмаларын жүйелі жүзеге асырудың нәтижесі.

2027 жылғы әлем чемпионаттарының барлығы Астана қаласында өтеді. Жоспар бойынша, шорт-тректен жасөспірімдер арасындағы әлем чемпионаты 28-31 қаңтарда, бокстан әлем чемпионаты 10-26 сәуірде, үстел теннисінен әлем чемпионаты 22-30 мамырда, дзюдодан әлем чемпионаты 7-14 маусымда, ал таеквондодан әлем чемпионаты 7-13 шілде аралығында ұйымдастырылады. Киберспорттан әлем чемпионатының нақты мерзімі кейінірек жарияланады.

Тәуелсіз Қазақстан тарихында алғаш рет еліміз екі жылдың ішінде жеті әлем чемпионатын өткізу мәртебесіне ие болып отыр. Бұл жетістік Қазақстанның халықаралық спорт ұйымдары алдындағы сенімін арттырып қана қоймай, әлемдік деңгейдегі жарыстарды жоғары талаптарға сай ұйымдастыра алатынын дәлелдейді.

Әлем чемпионаттарына әлемнің үздік спортшылары қатысады деп күтілуде. Мұндай ірі додалар ұлттық спорттың дамуына серпін беріп, жастардың спортқа қызығушылығын арттыруға және салауатты өмір салтын насихаттауға ықпал етеді.

Сонымен қатар халықаралық жарыстар оқиғалық туризмнің дамуына, қонақүй бизнесінің, қызмет көрсету саласының және инфрақұрылымның жандануына оң әсер етіп, Қазақстанның халықаралық имиджін одан әрі нығайтады.