АҚШ Иранға бес сағат бойы әуе соққыларын жасады
АҚШ әскери қолбасшылығы операцияның мақсаты Иранның теңіздегі шабуыл мүмкіндігін әлсірету болғанын мәлімдеді.
SMARTNEWS.KZ басылымының хабарлауынша, АҚШ Қарулы күштерінің Орталық қолбасшылығы (CENTCOM) Иран аумағына жасалған жаңа әскери операцияның аяқталғанын хабарлады. Ведомствоның мәліметінше, әуе соққылары бес сағатқа созылған.
CENTCOM мәлімдеуінше, операция барысында Бушер, Чахбехар, Джаск, Конарак, Әбу-Муса және Бендер-Аббас қалаларындағы бірқатар әскери нысандарға соққы жасалған.
АҚШ әскери қолбасшылығының хабарлауынша, операцияның негізгі мақсаты – Иранның коммерциялық кемелерге шабуыл жасау мүмкіндігін одан әрі әлсірету.
Ведомствоның мәліметіне сәйкес, жоғары дәлдіктегі қару-жарақ Иранның жағалаудағы қорғаныс жүйелеріне, зымыран әскерлерінің нысандарына, ұшқышсыз ұшу аппараттарына қатысты инфрақұрылымға, сондай-ақ әскери-теңіз күштерінің объектілеріне бағытталған.
Өз кезегінде Иран да жауап ретінде түнгі уақытта Кувейт пен Бахрейндегі АҚШ әскери базаларына соққы жасағаны хабарланды.
Республикалық ақпарат агенттіктерінің мәліметінше, шабуыл кезінде байланыс жүйелері, жанармай қоймалары, Patriot әуе шабуылына қарсы қорғаныс кешендері, бақылау мұнаралары және оқ-дәрі қоймалары нысанаға алынған.
Материал авторы
