«Байқоңырдан» зымыран ұшуына байланысты Қазақстан мен Ресей аспаны жабылды
Шектеулер «Союз МС-29» басқарылатын ғарыш кемесінің ұшырылуына байланысты енгізілген.
SMARTNEWS.KZ басылымының хабарлауынша, 14 шілдеде «Байқоңыр» ғарыш айлағынан «Союз МС-29» басқарылатын ғарыш кемесінің ұшырылуына байланысты Қазақстан мен Ресейдің бірқатар аумағында әуе кеңістігі уақытша жабылады. Бұл туралы SHOT жазды.
Авиациялық хабарламаларға (NOTAM) сәйкес, шектеулер Қазақстан аумағына, сондай-ақ Ресейдің Сібір және Қиыр Шығыс өңірлеріне таралады. Олар Мәскеу уақытымен сағат 17:47-ден 18:22-ге дейін, яғни 35 минут бойы күшінде болады.
Осы уақыт аралығында ұзындығы 4 мың шақырымнан асатын әуе дәлізінде жер бетінен бастап шектеусіз биіктікке дейінгі барлық ұшуға тыйым салынады.
Бұдан бөлек, Красноярск ұшу ақпараттық ауданына қарасты 33 әуе бағыты да уақытша жабылады. Кейбір бағыттарда шектеулер FL540 эшелонына дейін, яғни шамамен 16,5 мың метр биіктікке дейін қолданылады.
«Союз МС-29» ғарыш кемесінің ұшырылуы 14 шілдеге жоспарланған. Экипаж құрамында ресейлік ғарышкерлер Петр Дубров пен Анна Кикина, сондай-ақ америкалық астронавт Анил Менон бар.
Экипажбен бірге Халықаралық ғарыш станциясына ғылыми жабдықтар жеткізіледі. Олардың басым бөлігі медициналық-биологиялық зерттеулерге арналған.
Бағдарлама аясында ғарышкерлер 38 ғылыми тәжірибе мен мақсатты тапсырманы орындауы тиіс. Сонымен қатар Петр Дубров пен Анна Кикинаның ашық ғарышқа екі рет шығуы жоспарланған.
Материал авторы
